« bullarium-franciscanum-4719 »

Dilecto filio ministro generali fratrum ordinis Minorum.

Magna repleti mentis amaritudine tactique dolore cordis intrinsecus dudum auditis durissimis oppressionibus et saevissimis afflictionibus, quas gens illa Turcarum blasphemorum et persecutorum crudelium nominis christiani fidelibus in Romania et locis circumvicinis degentibus intulerant et continue ferali rabie inferebant, paternae pietatis nequivimus viscera continere, quominus eisdem fidelibus, qui, ut habebat fide dignorum relatio dolorosa, per Turcas praedictos eorum sanguinem sitientes tam per terram quam per mare impugnabantur hostiliter, vastabantur ignis incendiis, spoliabantur bonis suis, vulnerabantur, capiebantur et sicut animalia ducebantur in praedam, multis in ore gladii horribiliter interfectis, providere de alicuius opportunae defensionis et protectionis subsidio curaremus; ideoque tam per nos et Romanam ecclesiam quam carissimum in Christo filium Hugonem regem Cypri illustrem et dilectos filios magistrum et fratres Hospitalis sancti Ioannis Hierosolymitan. ac ducem et commune Venetorum et quosdam fideles alios certam armatam galearum in illis partibus pro certo tempore illuc ordinavimus destinandam. Postmodum autem attendentes, quod negotium huiusmodi non solum ad defensionem fidei et professorum ipsius, sed ad eamdem fidem catholicam, ad laudem et gloriam divini nominis consolationemque totius coetus fidelium dilatandam ampliori egere fulcimento, quod multarum exigebat expensarum profluvio, noscebatur, ad quae facilius et utilius portanda fidelium auxilia et caritativa subsidia opportuna multipliciter existebant, ad hoc fideles ipsos quibusdam spiritualibus munificentiis, indulgentiis videlicet et remissionibus, providimus invitandos, nonnullis venerabilibus fratribus nostris archiepiscopis et eorum suffraganeis per nostras dantes litteras in mandatis, ut ipsorum singuli (videlicet in suis singulis civitatibus et dioecesibus per se ac alias personas ecclesiasticas, saeculares et regulares ordinum quorumcumque, idoneas curarent publice proponere verbum crucis, venerabile signum eius fidelibus illud devote suscipere volentibus concedendo et eorum humeris imponendo et pro praemissis ad loca, de quibus eis videretur expediens, fideles convocando praedictos eosque suis salubribus exhortationibus commonendo, ut recipientes cum reverentia signum crucis illudque suis cordibus imprimentes contra infidelium praedictorum perfidiam insurgerent et negotium ipsum assumerent et prosequerentur viriliter et potenter.

Ut autem fideles praedicti tanto libentius praemissa studerent prosequi, quanto ex suis laboribus potiorem gratiam se percepturos sentirent, nos de omnipotentis Dei misericordia et beatorum Petri et Pauli apostolorum eius auctoritate confisi et illa quam nobis Deus licet indignis ligandi atque solvendi contulit potestate, fidelibus ipsis, qui cum dicta armata vel alias in succursum et subsidium christianorum praedictorum partium Romaniae contra infideles eosdem in personis propriis et expensis suis per mare sive per terram infra dictum tempus proficiscerentur et per unum annum continue vel interpolatim, eodem durante tempore, in dicti prosecutione negotii laborarent, nec non et illis, qui in eadem prosecutione decederent vel vulnerati ex illis vulneribus ubicumque morerentur, illam suorum peccaminum, de quibus veraciter corde contriti et ore confessi fuerint, veniam duximus indulgendam, quae concedi transfretantibus in Terrae sanctae subsidium consuevit. Eis autem, qui non in personis propriis, sed in suis dumtaxat expensis iuxta facultatem et qualitatem suam bellatores idoneos destinarent per tempus praedictum in huiusmodi prosecutione negotii moraturos, et illis similiter, qui licet alienis expensis in propriis tamen personis illuc accederent per tempus moraturi suprascriptum, et eis etiam, qui tantum pro dicto negotio de bonis propriis erogarent, quantum essent illuc eundo ac per dictum tempus morando et inde redeundo etiam expensuri, eamdem suorum concessimus veniam peccatorum. Huiusmodi quoque remissionis volumus et concedimus esse participes, iuxta quantitatem subsidii et devotionis affectum, omnes, qui ad subventionem dicti negotii de bonis suis congrue ministrarent et circa praemissa praestarent auxilium et consilium opportunum, sicut in eisdem litteris plenius continetur.

Et licet, sicut intelleximus, nonnulli ex eisdem archiepiscopis et suffraganeis circa praemissa exequenda satis se reddiderint diligentes, ut praedictum tamen negotium, pro quo, sicut habet multorum fide digna relatio, divina pietatis clementia in plerisque mundi partibus stupenda miracula operatur, quodque ferventibus et sinceris affectibus prosequimur, amplius valeat auctore Domino, cuius res agitur, prosperari: volumus, quod de tuo ac dilectorum filiorum Praedicatorum, Eremitarum sancti Augustini et beatae Mariae de monte Carmelo ordinibus, de singulis eisdem ordinibus videlicet in singulis provinciis per ordines ipsos destinatis, quatuor vel plures seu pauciores fratres idonei, prout ipsae provinciae ampliores vel strictiores fuerint et expedire videbitur, deputentur, qui solemniter in locis populosis et insignibus provinciarum ipsarum praedicationem et publicationem faciant solemniter, diligenter et fideliter supradictas.

Quocirca discretioni tuae per apostolica scripta mandamus, quatenus in singulis provinciis per eumdem tuum ordinem ut praefertur distinctis assumi facias et ordines celeriter dictos fratres, qui zelum Dei habentes ferventer et devote praedicationem et publicationem huiusmodi exequi fideliter, adhibita diligentia et sollicitudine, studeant et complere. Ne autem propter concurrentiam fratrum praefatorum ordinum, qui ad praemissa sicut praemittitur assumentur, oriri valeat dissensio vel scandalum suscitari, sic volumus ordinari, quod in singulis eisdem locis populosis et insignibus fratres ipsi diebus Dominicis et festivis gradatim et successive, sicut praecedunt et subsequuntur in processionibus, ad huiusmodi praedicationem et publicationem procedant, scilicet unus frater ex eisdem ordinibus uno die Dominico vel festivo, secundo alius alterius ordinis, et tertio et quarto alii ordinum aliorum subsequentibus diebus Dominicis et festivis, quousque praemissa compleverint solemniter et devote. Ut autem fratres ipsi ad huiusmodi officium assumendi tanto laborent circa illud sollertius et devotius, quanto ampliorem fructum ex suis laboribus huiusmodi se cognoverint percepturos, eos iuxta quantitatem laboris et devotionis affectum praedictarum indulgentiarum esse volumus et concedimus participes et consortes. Datum Avinione III kalendas augusti anno quarto.a