Description
-
Clément VI (1342-1352)
-
Guilelmum de Turre de Adria ecclesiae Potentin. (Potenza in partibus Neapol.) praeficit in episcopum.1
-
1343, iunii 16, Avinione.
-
1343
-
Dilecto filio Guillelmo de Turre de Adria electo Potentin.
Regimini universalis ecclesiae etc. Dudum siquidem felicis rec. Ioannes XXII praedecessor noster, videlicet XVI kalendas februarii pontificatus sui anno decimo, provisiones omnium ecclesiarum cathedralium in regno Siciliae consistentium dispositioni suae reservavit etc. Postmodum vero praefato praedecessore sublato de medio et piae memoriae Benedicto papa XII praedecessore nostro et eiusdem Ioannis immediato successore ad apicem assumpto, ecclesia Potentin. in regno consistente praedicto per obitum bonae memoriae Guillelmi episcopi Potentin., qui dicto Benedicto in humanis agente in partibus illis diem clausit extremum,a pastoris solatio destituta, dilecti filii capitulum ipsius ecclesiae, reservationis et decreti forsan ignari, dilectum filium Petrum de Madio archidiaconum eiusdem ecclesiae in Potentin. episcopum (quamvis de facto) elegisse dicuntur: qui reservationis et decreti praedictorum ut fertur inscius ad ipsorum capituli instantiam huiusmodi electioni praestans assensum electionem ipsam a bonae memoriae Petro archiepiscopo Acheruntino, metropolitano loci, petiit auctoritate metropolitica confirmari. Subsequenter autem dicto Benedicto, sicut Domino placuit, rebus humanis exempto et nobis gratia divina favente assumptis ad apicem dignitatis apostolicae ac huiusmodi electionis negotio ad nostram deducto notitiam: nos electionem ipsam, et quidquid ex ea secutum est, reputantes, prout erant, irrita et inania, ac ad provisionem ipsius ecclesiae celerem et felicem, cum nullus de provisione ipsius ecclesiae, de qua sic vacante idem Benedictus, dum vixit, minime ordinavit, praeter nos se hac vice intromittere posset, reservatione et decreto obsistentibus supradictis, intendentes, post deliberationem, quam ad praeficiendum eidem ecclesiae Potentin. personam utilem et fructuosam cum fratribus nostris habuimus diligentem, demum ad te ordinis Minorum professorem, in sacerdotio constitutum, cui de religionis zelo, litterarum scientia, honestate morum et vitae, prudentia spiritualium et temporalium providentia et aliis multiplicium virtutum meritis apud nos fide digna testimonia perhibentur, convertimus oculos nostrae mentis. Quibus omnibus debita meditatione pensatis, de persona sua ipsi Potentin. ecclesiae de fratrum nostrorum consilio auctoritate apostolica providemus teque illi praeficimus in episcopum et pastorem, curam et administrationem eiusdem Potentin. ecclesiae tibi tam in spiritualibus quam in temporalibus plenarie committendo etc. Datum Avinione XVI kalendas iulii anno secundo.
In eumdem modum Ioanni electo Acheruntino, capitulo et vassallis ecclesiae Potentin., clero ac populo civitatis et dioecesis Potentin., Ioannae reginae Siciliae illustri.b
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°210., pp.127-128
-
Reg. Vat. t. 161, (Clem. VI, a. 2, l. 5), ep. 8; Wadd. l. c. reg. pont. Clem. VI, n. 45. Cfr. huius op. t. V, pag. 250 not. 1, ubi tamen loco « eidem fratri Guilelmo » legendum est « fratri Guilelmo de Turre. »
1 -
(a) Qui a. 1314 in episcopum Potentin. promotus esse dicitur.
-
(b) Aliis litteris die 10 iul. datis S. P. eidem electo indulget, ut munus consecrationis a quocumque maluerit antistite recipere valeat (Reg. Vat. t. 162, f. 61, ep. 36).