« bullarium-franciscanum-4416 »

Charissimo in Christo filio Roberto regi Siciliae.

Habet fide dignorum assertio nostri apostolatus auditui saepius inculcata, quod quidam perversi homines se fratres de paupere vita vel aliis nominibus appellantes, qui diversorum colorum seu petiarum variarum curtos et deformes gestant habitus ab illis, quibus fratres ordinis Minorum utuntur, plurimum discrepantes, cum eisdem fratribus Minoribus tam in monasterio vocato de Corpore Christi Neapolitano quam in diversis aliis fratrum eorumdem conventibus ac diversis locis aliis infra regnum et terras tua consistentibus, non absque multis periculis et scandalis, praesertim divisionis et schismatis in praedicto suscitandorum ordine, cum diversum modum vivendi ab eisdem fratribus Minoribus habeant subesseque ipsorum praelatis et superioribus renuant, commorantur. Insuper aliqui ex eisdem superstitiosis hominibus, errores disseminantes varios et acuentes ad effundendum venenum (laxata labiis suis licentia temeraria) linguas suas, determinationibus et ordinationibus sedis apostolicae detrahere tam in secreto quam in publico memoriamque fel. rec. Ioannis papae XXII praedecessoris nostri ferire ac lacerare detractionis ictibus in multis regni et terrarum praedictarum partibus tamquam detractores et susurrones praesumptuosi et temerarii moliuntur. Sane, fili charissime, cum te, qui princeps existis catholicus et erga sedem praedictam praecipuae devotionis et reverentiae fulgore clarere dignosceris, tales homines pestiferos et nocivos eorumque latratus, susurrationes et detractiones huiusmodi non deceat nec expediat tolerare, regiam rogamus excellentiam, requirimus attentius et in Domino exhortamur, quatenus varia pericula, quae dictorum perversorum hominum, quorum secta iamdudum per sedem praefatam extitit reprobata, mutua conversatio praelibatis fratribus Minoribus ac eorum ordini propter ea, quae praemisimus, et alia multa, quae potest regia providentia circumspicere, comminatur, nec non quantam maculam in gloria serenitatis regiae praefatorum superstitiosorum hominum tolerantia cum praefatis fratribus seu in regno et terris praedictis poneret, deducens in regiae considerationis examen, ipsos de dictis conventibus repelli et amoveri procures nec eos in regno et terris praedictis toleres nec ab aliis tolerari permittas; sed potius, qualiter de suis erroribus et praesumptuosis temeritatibus per praelatos et alios, ad quos pertinet, debite corrigantur, regium praestes auxilium, consilium et favorem: sic te, fili charissime, super his habiturus, quod supradictis vitatis periculis tua sincera devotio exinde dignae commendationis et laudis praeconiis attollatur. Datum Avinione VIII kal. iulii, anno secundo.