« bullarium-franciscanum-4415 »

Venerabilibus fratribus Bertrando archiepiscopo Ebredunen. et Ioanni episcopo Anagnin., nostro in spiritualibus Urbis vicario.

Dudum ad audientiam nostri apostolatus perducto, quod quidam perniciosi homines et perversi se fraticellos seu fratres de paupere vita dicentes, quorum secta pestifera olim per sedem apostolicam damnata extitit et perpetuae prohibitioni subiecta, in Urbe ac terris ecclesiae Romanae immediate subiectis circumvicinisque partibus commorantes, errores et haereses varias periculose nimium seminabant, tam ordinariis quam dilectis filiis ‥ inquisitoribus haereticae pravitatis in praefatis Urbe, terris ac partibus auctoritate apostolica deputatis dedisse per nostras certi tenoris diversas litteras meminimus in mandatis, ut commissum eis inquisitionis officium solerter et fideliter super hiis et aliis negotium inquisitionis tangentibus exequentes de praedictis nequam hominibus eorumque receptatoribus, complicibus, fautoribus et valitoribus ac eorum et cuiuslibet ipsorum in hac parte criminibus, delictis et erroribus veritatem inquirere solerti adhibita diligentia procurarent, ad captionem, correctionem et punitionem eorum secundum sanctiones canonicas et privilegia concessa eidem inquisitionis officio nihilominus processuri. — Sane cum, sicut ad nos noviter est perlatum, praedictorum malorum et superstitiosorum hominum praesumptio periculosa et temeraria non est in illis partibus diminuta sed aucta, cum nedum ipsi quin immo quam plures alii eorum (sub aliis tamen diversis fictis habitibus) sequentes et imitantes damnata vestigia in eisdem Urbe, terris et partibus, necnon et in regno ac terris Siciliae disseminantes varios errores et haereses non sine multorum fautorum consiliis et auxiliis commorantur: Nos igitur tantis periculis obviari salubriter cupientes, fraternitati vestrae per apostolica scripta committimus et mandamus, quod vos et quilibet vestrum in solidum per vos vel alium seu alios adversus praedictos homines eorumque sequaces, complices ac receptores, fautores et adiutores, clericos et laicos, cuiuscunque status, dignitatis, praeeminentiae vel conditionis existant, etiamsi pontificali vel quavis alia dignitate, praeemineant, ... secundum canonicas sanctiones et privilegia concessa eidem inquisitionis officio ad inquisitionem, correctionem et punitionem talium, prout cuiuslibet excessus et delicti qualitas exegerit, per vos aut cum ordinariis et inquisitoribus praedictis, quos solicitetis super hiis, ... procedatis, ita quod pestifera labes extirpetur huiusmodi et catholicae fidei claritas remaneat illibata: contradictores etc.; non obstantibus etc. Datum Avinione IX kal. iulii anno secundo.a