« bullarium-franciscanum-4195 »

Iohanni de Polagniaco officiali Lingonensi.

Relatione percepimus fidedigna, quod ad tuam nuper deducto praesentiam, quod, cum quidam frater ordinis Praedicatorum in villa Dunensia Lingonensis diocesis clero et populo inibi congregato proponens verbum Dei et litteras apostolicas confessionem dilecti filii Petri de Corbario ordinis fratrum Minorum olim haeretici et scismatici eiusque abiurationes errorum et haeresum et alia, per quae ipse ad unitatem et gremium sanctae matris ecclesiae redire meruit, continentes solemniter eisdem clero et populo publicaret, quidam fratres ordinis praedicti Minorum de conventu villae praedictae, ad sermonem et publicationem huiusmodi cum beguinarum multitudine accedentes, sermonem et publicationem eosdem perturbare temerariis ausibus praesumpserunt, iniicientes in eundem praedicatorem manus suas violentas temere ac asserentes, dictum Petrum de Corbario super hiis, quae in antipapatu gesserat, in aliquo non errasse: tu una cum dilectis filiis Oddone de Castronovo et Symone de Vallibus, clericis familiaribus venerabilis fratris nostri Iohannis episcopi Lingonensis, te ad villam memoratam conferens coepisti super praedictis horrendis et detestandis veritatem inquirere, te ad exhibendum super eis iustitiam disponendo, super quibus tuam diligentiam plurimum in Domino commendantes discretionem tuam requirimus tibique districtius iniungendo mandamus, quatinus tam ex officio tuo quam auctoritate litterarum nostrarum, quas tibi dirigimus, super praemissis et aliis negotium huiusmodi tangentibus diligenter et fideliter cures procedere, quod inde debeas merito commendari: rescripturus nobis quantocius fideliter, quae in hac parte repereris et duxeris quomodolibet facienda. Datum [Avinione,] XI kalendas februarii, anno quintodecimo.