Description
-
Jean XXII (1316-1334)
-
Alexandrum Minoritam, poenitentiarium, apostolicum, ecclesiae Nucerin. praeficit in episcopum.1
-
1327, novembris 17, Avinione.
-
1327
-
Dilecto filio Alexandroa electo Nucerino.
Ad exequendum pastoralis officii debitum etc. Olim siquidem ex certis rationabilibus causis, quae ad id animum nostrum induxerunt, provisiones omnium ecclesiarum cathedralium in terris ad nos et ad Romanam ecclesiam spectantibus consistentium, tunc vacantium et vacaturarum in antea, ordinationi et dispositioni nostrae et dictae sedis apostolicae usque ad nostrum et ipsius sedis beneplacitum tunc duximus reservandas, decernentes ex tunc irritum et inane, si secus super his a quoquam quavis auctoritate scienter vel ignoranter contingeret attentari. Postmodum vero Nucerinab ecclesia, eidem Romanae ecclesiae immediate subiecta et in terra spectante immediate ad dictam Romanam ecclesiam constituta, per obitum bon. mem. Ioannis episcopi Nucerin., qui in partibus illis diem clausit extremum, pastoris solatio destituta, nos ad provisionem ipsius Nucerin. ecclesiae celerem, de qua nullus praeter nos se intromittere potest, reservatione et decreto praedictis obstantibus, paternis et sollicitis studiis intendentes ac cupientes talem eidem ecclesiae praeesse personam, quae curet et possit eamdem praeservare a noxiis et adversis ac in suis manutenere iuribus et etiam augmentare: post deliberationem, quam super his cum fratribus nostris habuimus diligentem, demum ad te ordinis fratrum Minorum professorem, poenitentiarium nostrum, quem litterarum scientia praeditum, conversationis et morum honestate decorum et discretionis et consilii maturitate dotatum, in spiritualibus providum et in temporalibus circumspectum aliisque virtutum meritis multipliciter novimus insignitum, direximus oculos nostrae mentis. Quibus omnibus attenta meditatione pensatis de persona tua nobis et eisdem fratribus ob huiusmodi tuorum exigentiam meritorum accepta, praefatae Nucerinae ecclesiae de ipsorum fratrum consilio auctoritate apostolica providemus teque illi praeficimus in episcopum et pastorem, curam et administrationem ipsius ecclesiae Nucerin. tibi tam in spiritualibus quam in temporalibus plenarie committendo etc. Datum Avinione, XV kalendas decembris, anno duodecimo.c
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°689., p.335
-
Reg. Vat. t. 85, ep. 341, apud Wadd. l. c. ad a. 1327, n. 16, et reg. pont. Io. XXII, p. 2, n. 86.
1 -
(a) Cognom. « Venciolo », Perusino, qui a. 1363 fama sanctitatis obit Saxoferrati ibique apud fratres Min. sepelitur.
-
(b) Nocera in Umbria.
-
(c) In e. m. capitulo et vassallis ecclesiae Nucerin. atque clero et populo civ. et dioec. Nucerin. — Die 11 apr. 1328 summus pontifex eidem Alexandro conservatores constituit episcopos Anconitan., Cortonen., Eugubin., atque facultatem concedit contrahendi mutuum usque ad summam 2000 flor. auri (l. c. t. 86, epp. 1648 et 1649). Die autem 1 dec. 1331 thesaurario ducatus Spoletan. praedicit, ne Alexandrum ep. Nucerin. super restitutione cuiusdam quantitatis bladi aut vini amplius molestet (l. c. t. 103, ep. 1509).