« bullarium-franciscanum-3727 »

Dilecto filio Ioanni electo Albinganen.

Angit nos cura pastoralis officii etc. Olim siquidem bonae memoriae Emanuele episcopo Albinganen. praesidente regimini Albinganen.a ecclesiae, nos cupientes per apostolicae sedis providentiam eidem Albinganen. ecclesiae, quam in visceribus gerimus charitatis, post ipsius Emmanuelis obitum personam utilem praesidere, provisionem ipsius Albinganen. ecclesiae, cum eam vacare contingeret, ea vice eiusdem sedis dispositioni duximus specialiter reservandam, decernentes ex tunc irritum et inane, si secus super his per quoscunque scienter vel ignoranter contingeret attentari; et deinde praedicta Albinganen. ecclesia per obitum ipsius Emmanuelis pastoris solatio destituta, nos ad provisionem ipsius ecclesiae Albinganen., ne prolixae vacationis exponeretur incommodis, coepimus intendere diligenter, et post deliberationem, quam ad deputandum eidem ecclesiae personam utilem ac etiam fructuosam, cuius industria probitatis dicta ecclesia in suis valeret iuribus adaugeri, tandem ad te ordinis fratrum Minorum professorem, in sacerdotio constitutum, qui de litterarum scientia, vitae munditia, religionis observantia et aliarum virtutum meritis laudabili testimonio commendaris, direximus oculos mentis nostrae: quibus omnibus debita meditatione pensatis, de persona tua, nobis et eisdem fratribus ob huiusmodi tuorum exigentiam meritorum accepta, de ipsorum fratrum consilio eidem ecclesiae auctoritate apostolica providimus, praeficientes te praefatae ecclesiae in episcopum et pastorem, curam et administrationem ipsius ecclesiae tibi tam in spiritualibus quam in temporalibus committendo etc. Datum Avinione, XV kal. augusti, anno quinto.b