« bullarium-franciscanum-3485 »

Dilecto filio Percevallo electo Nubien.a

Regimini universalis ecclesiae etc. Nuper siquidem ecclesia Nubien. pro eo, quod venerabilis frater noster Ioannes episcopus olim Nubien. regimini eiusdem ecclesiae, cui praeerat, retento sibi honore pontificalis officii, per venerabilem fratrem nostrum Porchettumb archiepiscopum Ianuen., procuratorem suum ad hoc ab eo sufficiens et speciale mandatum habentem, ex causis legitimis sponte cessit in manibus dilecti filii nostri Petri de Columna sanctae Romanae ecclesiae diaconi cardinalis, de mandato nostro vivae vocis oraculo sibi facto cessionem huiusmodi apud sedem apostolicam admittentis, pastoris regimine destituta, nos attendentes, quod nullus praeter nos de provisione ipsius ecclesiae Nubien. se intromittere poterat (pro eo, quod nos olim ante vacationem huiusmodi provisiones omnium ecclesiarum tam cathedralium quam aliarum, quas apud sedem eamdem vacare contingeret, dispositioni nostrae ac dictae sedis duximus reservandas, decernendo ex tunc irritum et inane, si secus super hoc a quoquam quavis auctoritate scienter vel ignoranter contigerit attentari), ad provisionem ipsius ecclesiae, ne prolixae vacationis exponatur incommodis, coepimus intendere diligenter; et post deliberationem, quam ad deputandum eidem ecclesiae approbatam idoneamque personam cum fratribus nostris habuimus, demum ad te ordinem fratrum Minorum professum, cui litterarum scientia, laudabilis discretionis industria, vitae munditia, honestas morum et religionis zelus suffragari noscuntur, direximus aciem mentis nostrae. Quibus omnibus diligenti meditatione pensatis de persona tua nobis et eisdem fratribus tuorum exigentia meritorum accepta dictae Nubien. ecclesiae providemus, praeficientes te ipsi ecclesiae de ipsorum fratrum consilio et apostolicae plenitudine potestatis in episcopum et pastorem, curam et administrationem eiusdem ecclesiae in spiritualibus et temporalibus tibi plenarie committendo etc. Datum in prioratu de Grausello prope Malausanam, VIII kalendas iulii, pontificatus nostri anno septimo.

In e. m. dilectis filiis capitulo et universis vasallis ecclesiae Nubien. necnon clero atque populo civ. et dioc. Nubien., denique vener. fratri archiepiscopo Ianuen. tamquam metropolitae.