« bullarium-franciscanum-3216 »

BONIFACIUS &c.

Dilecto filioa Fratri Porchetto de Domo Spinulæ Januensis, Ordinis Fratrum Minorum, Administratorib Ecclesiæ Januensis Salutem, & Apostolicam Ben.

Vidimus, quæ missæ nuper Nobis tuæ litteræ continebant, & commendamus quamplurimum tuæ sollicitudinis, & diligentiæ studium adhibitum super iis, quæ tibi pridem per nostras litteras scripseramus. Gaudemus inquam de illorum devota providentia Januensium, qui se velut ab infecti gregis indevotorum scilicet consortio segregantes, de non præstando deinceps auxilium, consilium & favorem Friderico, & Siculisc rebellibus, aut eorum Nuntiis, & fautoribus contra Nos, & Romanam Ecclesiam, & carissimum in Christo filium nostrum Carolum Siciliæ Regem illustrem juxta rescripti nostri formam præstiterunt, ut scripsisti, corporaliter juramenta. Miramur autem, & admodum perturbamur de indignatione, quinimmo præcipitatione mirabili ... Potestatis ... Abbatis, Antianorum, Consilii, & Communis Januensium, quòd super iis in salute discrimen, in pace scandalum, in unitate divisionem, & in reformatione destructionis causam nequiter suggerentes, præstationi, & receptioni juramentorum hujusmodi obviare damnabiliter sunt moliti. Et quod detestabiliùs in causam abominandæ perversitatis advenit, ac hæreseos notabili nota non caret, petitum est pro parte dicti Communis, ut durantibus in errore Ecclesiarum pandatur introitus, ac hujusmodi præstantes juramenta, & redeuntes prudentiùs ad salutem non reciperentur ullatenus ad Divina. Et nihilominus ab omni consilio Ecclesiæ Romanæ statum prædicti Regis Siciliæ contingente perpetuò sunt privati, & inhabiles redditi ad Officia, & Beneficia dicti Communis. In iis quidem non aliud, quam Divinæ, ac humanæ legis enervare velle judicium præsumuntur, nec propter Regalium Nuntiorumd instantiam penes te incaute forsitan insistentium debuisti desistere ab incœptis. Unde mallemus ut sicut laudabili discretione processeras, continuasses præfata recipere juramenta, cum non sit sub ambiguitate ferendum, quòd causam suam Altissimus, qui cooperatores bonorum operum sua ineffabili virtute corroborat, confovisset. Ut igitur super receptione juramentorum, & aliis per te in posterum faciendis, de intentione nostra tibi pleniùs innotescat, volumus, & per Apostolica tibi scripta mandamus, quatenus ad receptionem eamdem, & ut ipsa tibi juramenta præstentur, ac ad executionem omnium, quæ per præfatas nostras litteras tibi duximus injungenda, & exequenda, supersunt, promptis studiis, & diligentiâ exactâ procedas. Sic te in omnibus prudenter, diligenter, & fideliter habiturus, quòd honoris Ecclesiæ Matris tuæ, ac salutis Januensium promotor fervidus comproberis, & digne merearis Divinam, & nostram benedictionem, & gratiam uberiùs promereri. Datum Laterani VII. Kalendas Februariie, Pontificatus nostri Anno VII.