« bullarium-franciscanum-3215 »

BONIFACIUS &c.

Dilectis filiis ... Priori Provinciali, & Fratribus Heremitarum Ordinis Sancti Augustini in Provincia Turingiæa , & Saxoniæb Salutem, & Apostolicam Benedictionem.

Exhibita nuper Nobis vestra petitio continebat, quòd vos jam quatuor annis elapsis, & amplius in Castro novo Quidelingborchc Alberstaden.d Diœcesis de consensu Ven. Fratris nostrie .... Episcopi Alberstaden. loci Diœcesani locum ad construendum, ædificandum, inhabitandum, & permanendum pro vobis, & Fratribus vestri Ordinis recepistis, ibique ad hoc construxistis, & ædificastis Oratorium, & Domos, ac ea inhabitastis, & tenuistis, & inhabitatis etiam, & tenetis. Verùm ‥ Guardianus, & Fratres Ordinis Minorum Loci alterius Castri, quòd dicitur Castrum antiquumf Quidelingborch, prætextu privilegiig eis ab Apostolica Sede concessi, per quod aliorum Religiosorum loca infra mensuram centum quadraginta cannarum, prope loca ipsorum FF. Min. haberi, vel fieri prohibentur, asserentes prædictum locum vestrum de Castronovo prope jam dictum Locum eorum de Castro antiquo infra mensuram cannarum hujusmodi esse situm, nituntur ipsum Locum vestrum facere demoliri. Quare Nobis humiliter supplicastis, ut cum prædicta Castra sint sub diversis dominiis, & jurisdictionibus constituta, & flumen quoddam decurrat per medium inter ea, dictusque Locus vester distet a prædicto Loco eorum ultra hujusmodi mensuram centum quadraginta cannarum, si per viam scilicet, per quam itur de altero ad alterum eorumdem, & per terram tantummodo mensuretur, licèt si fieret mensuratio per aerem, & supra domos, muros, & flumen prædicta mensura centum quadraginta cannarum comprehenderet Loci distantiam utriusque, providere vobis super hoc de benignitate Apostolica dignaremur. Nos igitur intendentes, ut præfatum privilegium, seu cannarum terminatio vel mensura Locum non habeat inter Religiosorum Loca sita in diversis Civitatibus, Castris; aut Terris, seu Villis, & maxime consistentibus sub diversis Dominiis, & jurisdictionibus, sed in iis tantùm Religiosorum Locis factis vel faciendis, quæ sub uno, & eodem corpore alicujus Civitatis, vel Castri, seu Terræ, vel Villæ comprehendere, seu attingere posset cannarum mensura, vel terminatio prædictarum, præsentium vobis auctoritate concedimus, ut hujusmodi privilegio, seu oppositione dictorum Fratrum Minorum, aut quibuscumque privilegiis, gratiis, indulgentiis, & litteris eis a prædicta Sede concessis nequaquam obstantibus, possitis vos, & alii Fratres vestri Ordinis in prædicto loco vestro de Castronovo licite, ac libere remanere, nec ad dirutionem, seu destructionem ipsius Loci vestri, vel ad illum quomodolibet relinquendum aliquatenus teneamini, neque ad id a quoquam compelli, vel coarctari quomodolibet valeatis. Nulli ergo &c. nostræ concessionis &c. Datum Laterani XVIII. Kalendas Februarii, Pontificatus nostri Anno Sexto.