« bullarium-franciscanum-3079 »

BONIFACIUS &c.

Venerabili Fratri Conradoa quondamb Tullen.c Episcopo Salutem, & Apostolicam Benedictionem.

Intellecto dudum, quòd tu longa subportatione Pontificalis sarcinæ fatigatus, ac denique affectus tædio, & multiplici labore confractus, ut sæcularium vitares strepitum agendorum, ac circa observantiam Ordinis Fratrum Minorum, quem fuisti professus juxta votum tui animi commodiùs vacare valeres, imminenti tibi oneri cedere cupiebas, illis, quos ad hoc procuratores duxeras statuendos, cedendi concessimus a Nobis licentiam tuo nomino postulatam. Et admissa cessione per eos ipso nomine in manibus nostris facta, te a vinculo quo Tullen. tenebaris Ecclesiæ, Pontificali honore tibi dimisso, duximus de Apostolicæ potestatis plenitudine absolvendum, ac demum de ipsius Ecclesiæ ordinatione celeri, ne prolixioris vacationis exposita manere posset incomodis diligentiùs cogitando, Venerabilem Fratrem nostrum Johannemd tunc Episcopum Trajecten.e a vinculo, quo Trajecten. tenebatur Ecclesiæ per Nos de Fratrum nostrorum consilio absolutum ad eandem Tullen. Ecclesiam transferentes, ipsum prædictæ Tullen. Ecclesiæ de ipsorum Fratrum consilio in Episcopum præficimus & Pastorem. Ad personam itaque tuam Nobis de honestate vitæ, aliisque probitatibus fide dignorum testimonio commendatam, compassionis animum convertentes, ac nolentes, quòd in officii Pastoralis opprobrium, qui facultatum abundantiam dimisisti, necessariorum cogaris incommoda experiri, rerumque inopiam patiaris, tuis supplicationibus inclinati decernimus tibi fore pro sustentatione tua de bonis ad Episcopum Tullen. qui nunc est, vel qui pro tempore fuerit, spectantibus in ducentis librisf Turonen. parvorum infra quindenam commemorationis omnium Sanctorum tibi, vel tuo Procuratori tuo nomine annis singulis, quoad vixeris, persolvendis pensionis nomine providendum. Non obstante, si eidem Episcopo a Sede Apostolica sit indultum, vel medio tempore indulgeri contingat, quòd ad provisionem alicujus in pensionibus quibuscumque minime teneatur, & ad id compelli non possit per litteras Apostolicas non facientes plenam & expressam, ac de verbo ad verbum de indulto hujusmodi mentionem. Ceterum cum sint ad cautelam hæ litteræ duplicatæ, nolumus, ut per hoc memorata pensio duplicata intelligatur, vel in aliquo augmentata, sed ambæ litteræ pro una tantummodo, & concessio unica censeatur, & de ducentis Turonen. libris prædictis dumtaxat, & semel annis singulis fiat solutio, & penitus nihil amplius exigatur. Nulli ergo omnino hominum liceat hanc paginam nostræ constitutionis &c. Datum Romæ apud S. Petrum VI. Kalendas Aprilis, Pontificatus nostri Anno Secundo.