Description
-
Nicolas IV (1288-1292)
-
Donationem Ecclesiæ S. Blasii a Clarissis Anagnin. eis factam confirmat. ex epist. 377. Reg. Vat. apud Vaddingum ad hunc ann. n. 44. Regesti Pontif.
-
Anno 1290. die 4. Augusti.
-
1290
-
NICOLAUS &c.
Dilectis filiis ‥ Guardiano, & Fratribus Minoribus Anagnin.a Salutem, & Apostolicam Ben.
Cum a nobis petitur quod justum est, & honestum, tam vigor æquitatis, quàm ordo exigit rationis, ut id per sollicitudinem officii nostri ad debitum perducatur effectum. Sane petitio vestra Nobis exhibita continebat, qud dilectæ in Christo filiæ ‥ Abbatissa, & Sorores Monasterii Sancti Petri de Vineisb Anagnini ad Romanam Ecclesiam nullo medio pertinentis Ordinis Sanctæ Claræ grata, & utilia servitia, quæ in ipsarum factis, & negotiis a Fratribus vestri Ordinis dudum receperant, providere attendentes, ac cupientes animarum promovere salutem, Ecclesiam Sancti Basiliic Anagnin. eis pleno jure subjectam cum omnibus domibus, portisd, & pertinentiis suis Custodi Fratrum Minorum Campaniæe, suo, ac Generalis, & Romanæ Provinciæ Ministrorum, eorumque successorum nomine per donationem, quæ dicitur inter vivos, pure, ac libere contulerunt, volentes, ut Fratres vestri Ordinis inibi commorantes devotum impendant Domino famulatum, prout in Instrumento publico inde confecto pleniùs dicitur contineri. Sicque vos post hujusmodi concessionem ad prædictam Ecclesiam accedentes ibi habitationem vestramf, & locum, sicut asseritis, facere decrevistis. Cum autem, sicut asseritis, in hoc Romani Pontificis, sicut intervenire debebat de jure, non intervenisset assensus, Nobis humiliter supplicastis, ut providere vobis in hac parte de benignitate Apostolica dignaremur. Nos igitur vestris supplicationibus inclinati, quod super hoc provide factum est, ratum, & gratum habentes, defectu hujusmodi non obstante, auctoritate Apostolica confirmamus, & præsentis scripti patrocinio communimus. Nulli ergo &c. nostræ confirmationis infringere &c. Dat. apud Urbem veterem II. Nonas Augusti, Pont. nostri An. III.
-
Bullarium Franciscanum romanorum pontificum, tomus IV, n°CCXCIV., p.166
-
(a) FF. Min. Anagnin.: a tempore S. P. Francisci, ut fert traditio, fundatus est eorum Conventus extra Civitatem ad 500. circiter passus in Colle Portus, dicto postea Colle S. Francisci, ubi adhuc vestigia cernuntur cum cisterna a nostris possessa, estque caput Custodiæ Campaniæ in Provincia Romana ex veteri Provinciali Ordinis apud Chronicon Jordani MSS. Vatic. & Barthol. Pisanum in Conform. xi. ac in hoc loco obit Fr. Haymo Anglus Minister Generalis Ordinis anno 1244. ex Annal. Minor.
-
(b) Monasterii S. Petri de Vineis: antea S. Blasii nuncupati, quod dimiserunt, dederuntque Fratribus nostris hoc anno Sanctimoniales, accepto paulò antea isto S. Petri in vineis 500. passibus extra Civitatis portam, quæ ducit Palianum Circium versus; Illud nunc PP. Cappuccini inhabitant, Monialibus jampridem intra Civitatem ad locum nunc S. Claræ dictum translatis.
-
(c) Sancti Basilii: lege S. Blasii, ut habet ipse Vaddingus in Annal. ad hunc annum n. 37. & ex diplomate Abbatis Casinen. huic Monasterio directo, quod habetur ad calcem par. 1. Hist. Cassinen. Cl. Abb. Gattulæ in hunc modum. “Venerabilis Pater Domnus Riccardus Abbas Monasterii Cassinensis de sua propria, & libera voluntate, & spontanea, pia, & provida deliberatione concessit, donavit, & irrevocabiliter tradidit in perpetuum in jus, & proprietatem venerabili viro Fratri Raynaldo de Toccho Domini Papæ Pœnitentiario, & Capellano recipienti nomine, & vice Abbatissæ, & Conventus Sororum Monasterii Sancti Blasii de Civitate Anagniæ Ordinis Sancti Damiani, & per ipsas dicto Monasterio pro sustentatione vitæ ipsarum, ob reverentiam SS. Patris Domini Alexandri Papæ IV. cujus ipsa Abbatissa, & Sorores sunt filiæ spirituales, Ecclesiam Sancti Cæsarii sitam juxta fontem, qui dicitur Fons Sancti Cæsarii, in strada publica Territorii ejusdem Civitatis &c. cum domibus, terris cultis & incultis, vineis, casalibus, nemoribus sylvis, pratis, ortis, possessionibus, & omnibus aliis bonis suis &c. & tam eadem Abbatissa, & Conventus, quæ nunc sunt, quàm aliæ Abbatissæ & Sorores, quæ in eodem Monasterio pro tempore fuerint, vel quæ eis successerint, teneantur prædicto Monasterio Cassinensi in festo B. Benedicti duas libras ceræ pro censu reddere annuatim &c. Actum Laterani in Camera Domini Papæ coram Magnifico Angelo dicto Priore Domini Papæ Cappellano, Theodino Hostiario Domini Papæ, Fratre Andrea de Ordine Minorum &c.
-
(d) Portis: forsan legendum pratis, vel hortis.
-
(e) Campaniæ: quæ erat 6. al. 7. ac ultima Custodia Provinciæ Romanæ.
-
(f) Habitationem vestram: sed eò nequaquam Fratres se contulerunt; verùm in veteri loco permanserunt usque ad annum 1300. quo a Bonifacio VIII. receptis Ecclesiis SS. Matthæi, & Stephani de Portario prope portam Romanam, nunc Sancti Francisci, eò se transtulerunt, ut ibi videbitur ex Bulla Dum fructus uberes &c. eo anno die 17. Julii data.