« bullarium-franciscanum-2617 »

NICOLAUS &c.

Dilecto filio Nicolitto Nicolai Rectori Ecclesiæ Sancti Laurentii de Pastin. Firman. Diœcesisa Sal. & Ap. Ben.

Ad audientiam nostram pervenit, quòd Servientes, Satellites, & Familiares Mutini Potestatis Civitatis Esculan.b ad Monasterium dilectarum in Christo filiarum Abbatissæ, & Conventus Sanctæ Mariæc. Dominarum extra muros Civitatis ejusdem Ordinis Sanctæ Claræ de mandato ipsius Potestatis manu armata hostiliter accedentes, ac in personas servientium, & familiarium ipsius Monasterii nequiter irruentes, fractis portis Ecclesiæ, ac domorum ejusdem Monasterii, ac scalis Palatii, per quas ad ostium Monialium ascenditur, Fratrem Petrum conversum ejusdem Monasterii evaginato gladio, Dei timore postposito, usque ad effusionem sanguinis vulnerarunt; quibusdam verò Fratribus de Ordine Minorum, qui ad Monasterium ipsum propter clamorem ex hoc suscitatum in dicta Civitate accesserant, graves injurias irrogarunt, ignem apponere in dicto Monasterio clamoribus, & aliis nefandis actibus comminantes: Consilius insuper miles, & socius dicti Potestatis civibus dictæ Civitatis inhibuit, & præcepit sub pœna capitis ex parte ipsius Potestatis, ne aliquis de dicta Civitate eisdem Abbatissæ, & Conventui impenderet aliquod auxilium, vel favorem. Ne igitur tantæ temeritatis excessus remaneat impunitus, discretioni tuæ per Apostolica scripta mandamus, quatenus, si tibi per famam publicam, vel indaginem aliquam constiterit de præmissis, Potestatem, militem, & alios præcipue hujusmodi excessuum patratores ex parte nostra peremptorie citare procures, ut infra quindecim dies post citationem tuam compareant personaliter coram Nobis pro meritis recepturi, ac facturi super iis, quod ordo dictaverit rationis. Diem verò citationis, & formam, & quidquid inde feceris Nobis per tuas litteras harum seriem continentes studeas fideliter intimare. Datum Romæ apud Sanctam Mariam Majorem XV. Kalendas Martii, Pontificatus nostri Anno Secundo.