« bullarium-franciscanum-2616 »

NICOLAUS &c.

Universis Christifidelibus per Africam constitutis Salutem, & Ap. Ben.

Illius, licèt immeriti, Vicarii constituti, qui pro salute humani generis de supremis Cælorum ad ima Mundi descendens, & discipulos, quos elegit, in universum Mundum trasmisit omni creaturæ Evangelium prædicare, nonnumquam viros providos, & discretos, cum nequeamus locis singulis corporali præsentia imminere, instructi ejus exemplo in partem sollicitudinis evocamus pro negotiorum urgentium qualitate, qui prava in directa, & aspera convertentes in plana, rectas faciant semitas Dei nostri, populumque acceptabilem sibi reddant. Sane de circumspectione Venerabilis Fratris nostria Episcopi Marrochitani Apostolicæ Sedis Legati plenam in Domino fiduciam obtinentes, ipsum in Africam universam ad cultum divini nominis ampliandum, commisso sibi plenæ Legationis officio, ut juxta datam sibi a Deo prudentiam evellat, & dissipet, ædificet, & plantet, inhærendo vestigiis felicis recordationis Alexandri Papæ iv. prædecessoris nostri, qui bonæ memoriæ Blancob Episcopo Marrochitano prædecessori ejusdem Roderici Episcopi similem legationem concessitc, providimus de Fratrum nostrorum consilio destinandum. Quocirca Universitatem vestram rogamus, monemus, & hortamur attente, per apostolica vobis scripta præcipiendo mandantes, quatenus ipsum Sedis prædictæ Legatum tamquam personam nostram, vel potiùs Nos in eo recipientes cum debita reverentia, & honore, illius monitis, & mandatis plenarie, ac humiliter intendere procuretis, ita quòd idem ad gloriam Dei, & animarum profectum injunctum sibi ministerium exequi valeat inoffense, Nosque devotionem vestram possimus exinde meritò commendare. Alioquin sententiam, quam idem tulerit in rebelles, ratam habebimus, & faciemus, auctore Domino, usque ad satisfactionem condignam inviolabiliter observari. Datum Romæ apud S. Mariam Majorem XV. Kalendas Martii, Pontificatus nostri Anno II.