« bullarium-franciscanum-2492 »

NICOLAUS &c.

Dilectis Filiis ‥ Priori Prædicatorum, & ‥ Guardiano Minorum Fratrum Ordinum Ulixbonen., vel eorum vicem gerentibus Salutem, & Apostolicam Benedictionem.

Per alias nostras litterasa compositionem inter Venerabiles Fratres nostros T. Archiepiscopum Bracharen., A. Colimbrien. B. Silven. & J. Lamecen. Episcoposb pro se, Prælatis aliis, Ecclesiis, & personis Ecclesiasticis Regni Portugalliæ, & Algarbii ex parte una, & dilectos filios Martinum Petri Cantorem Elboren. & Johannem Martini Canonicum Colimbrien. Procuratores Dionysii Portugalliæ & Algarbii Regis Illustris nomine ipsius Regis ex altera super quibusdam articulis numero quadraginta nuper habitam apud Sedem Apostolicam sub certa forma duximus confirmandam, ordinantes providentes decernentes & statuentes aliqua circa illam, prout in prædictis litteris pleniùs continetur, & inter cætera de partium voluntate providimus, quòd postquam idem Rex Dionysius ratificaverit acceptaverit & approbaverit in sua Curia generali ad hoc specialiter congregata omnia & singula, quæ cum dictis Archiepiscopo, & Episcopis per eosdem Procuratores suos acta sunt ejus nomine in præmissis, & hujusmodi nostris confirmationi ordinationi provisioni decreto, seu statuto expresse consenserit, eaque, ac omnia, & singula contenta in eis, se, suosque successores in eodem Regno promiserit plene adimpleturos, & perpetuò inviolabiliter servaturos, & super ratificatione acceptatione approbatione ac promissione hujusmodi patentes litteras suo Regio plumbeo sigillo munitas vobis, seu vestris vicem gerentibus Ecclesiæ Romanæ nomine, quàm dicto Archiepiscopo, & singulis Episcopis, vel ipsis absentibus eorum Vicariis, vel aliqua ejusdem Regni Ecclesia Cathedrali vacante, Vicariis, seu Vicario quoad spiritualia in eâdem, necnon & singulis Capitulis Ecclesiarum Cathedralium prædicti Portugalliæ & Algarbii Regni concesserit in forma, quam Sedes eadem sibi duxerit destinandam, nec ipse Rex Dionysius, nec aliquis successorum ipsius ad observandam provisionem, sive ordinationem felicis record. Gregorii Papæ x. prædecessoris nostri super articulis, de quibus inter ipsos Prælatos, & quondam A. Regem Portugalliæ dicti Regis Dionysii Genitorem erat controversia, editam, aliquatenus teneatur, sicut in eisdem nostris litteris hæc, & alia manifestiùs exprimuntur. Volentes itaque hujusmodi promissionem dicti Regis plenius robur, & efficaciam obtinere, vobis stipulandi ejusdem Ecclesiæ Romanæ nomine a memorato Rege præmissa, & recipiendi super omnibus prædictis promissionem ab ipso, plenam & liberam concedimus de Apostolicæ potestatis plenitudine facultatem. Ceterum volumus, & præsentium vobis auctoritate mandamus, quatenus quidquid super iis duxeritis faciendum, Nobis per vestras patentes litteras fideliter intimare curetis. Datum Romæ apud S. Mariam Majorem XII. Kalendas Aprilis, Pontificatus Nostri Anno Secundo.