Description
-
Nicolas IV (1288-1292)
-
Studeant conservare medietatem portionis Communi Viterbien. debitam, eis ratione Inquisitionis perventæ. ex Vatic. Reges. Pontif. epist. 126. anno 1.
-
Anno 1288. die 30. Aprilis.
-
1288
-
NICOLAUS &c.
Dilectis Filiis Alamannoa de Balneoregio, & Franciscob de Reate Ord. Min. Inquisitoribus Hær. prav. in Romana Provincia Sal. & Ap. Ben.
Exposuit Nobis dilectus filius nobilis vir Ursusc de filiis Ursi nuper in nostra præsentia constitutus, quòd licet olim de diversis discordiis, & contentionibus inter ipsum & Commune Viterbien. super nonnullis Castris, & aliis rebus exortis, interveniente dilecto Filio Fratre Angelod de Reate Ordinis Minorum tunc Inquisitore pravitatis hæreticæ in Romana Provincia, fuerit facta concordia,e quampluribus pactis, & conventionibus, infra certa ad hæc constituta tempora adimplendis, adjectis; necnon & certâ pœnâ a parte non servante pactâ, & conventiones prædictas parti alteri eadem observanti, ratis manentibus eisdem pactis & conventionibus, persolvenda; sicut in litterisf felicis record. Honorii Papæ g prædecessoris nostri, & variis instrumentis publicis dictus nobilis asserit pleniùs contineri; & jam dicta tempora sint elapsa; nondum tamen sunt prædicta pacta, & conventiones, prout inter partes convenerant, adimpleta; propter quod idem nobilis proponens, prædictam esse commissam, supplicavit humiliter per vos super iis de oportuno sibi remedio provideri. Quocirca discretioni vestræ per Apostolica scripta mandamus, quatenus si pro eodem nobili per dilectos Filios Magistros Deodatum Lexoviensis, & Rogerium de Salerno Panormitanæ Ecclesiarum Archidiaconos Cappellanos nostros, & Fidantiam Canonicum Balneoregensem, quibus causam hujusmodi per alias nostras sub certa forma litterash duximus committendam, fuerit sententia promulgata, nec sententia ipsa legitimâ provocatione suspensa; ex tunc medietatem portionis, quæ ad manus vestras ratione commissi vobis officii Inquisitionis Hæreticæ pravitatis pervenerit, debitam Communi præfato, studeatis sollicite conservare; nihil de ipsa disponendo, vel ordinando sine nostra speciali licentia & mandato per vos, vel Successores vestros in Officio memorato. Datum Romæ apud Sanctum Petrum III. Kalendas Maji, Pontificatus nostri anno primo &c.
-
Bullarium Franciscanum romanorum pontificum, tomus IV, n°XVI., p.16
-
(a) Alamanno: qui postea fuit Archiepiscopus Arboren. & Tyren. in Sardinia, ac Pontif. Vicarius in Urbe, ut apud Vaddingum ad ann. 1299. n. 3., & Autorem Sardiniæ sacræ p. 242. n. xi.
-
(b) Francisco: quem forte Cœlestinus V. anno 1284. Senogaliensi Ecclesiæ præfecit, Bonifacius verò VIII. in sequenti anno ad Spoletanam transtulit.
-
(c) Ursus: Nicolai III. Papæ Nepos, de quo in 3. hujus Operis tomo egimus.
-
(d) Fr. Angelo: de quo etiam in cit. 3. hujus Operis tomo.
-
(e) Facta concordia: anno 1285. die 4. Septembris.
-
(f) In litteris: Honorii IV. incip. Beneplacitum est Domino &c. eo anno 1285. die 4. Septembris, & in dicto 3. tomo hujus Bullarii pag. 541. relatis.
-
(g) Honorii Papæ: hujus nominis Quarti.
-
(h) Litteras: quæ forsan perierunt, cum ad nos non pervenerint.