Description
-
Grégoire X (1271-1276)
-
Ex Cardinalium consilio Regem Romanorum denominat, insignia Imperialia pollicetur, & ut de ea excipienda se præparet, hortatur. (Ex Cod. Vallic. pag. 44. apud Raynaldum ad hunc ann. n. 55., & Petrum M. Campi Hist. Placent. par. 2. in Reges. n. 184.)
-
Anno 1274. die 26. Septembr.
-
1274
-
GREGORIUS &c.
Carissimo in Christo Filio Rodulphoa Regi Romanorum Illustri Salutem, & Apostol. Benedictionem.
Solent ardua præcipuè propensis digesta consiliis sentire potius celeritatis ex directione compendium, quam pati dispendium tarditatis. Sic longa belli præparatio celerem consuevit afferre victoriam. Sic iterùm festinatur instanter, dum solicitè præparatur. Hæc nos consideratio in Imperialis negotii prosecutione hucusque detinuitb: hæc in tui consumatione fastigii multa uti maturitate suasit: hæc varias vias suggessit exquirere, diversaque remedia cogitare; ut, Deo auspice, tantò illa, quæ instant, deducamus securiùs, quantò accuratiùs præparamus. Licet itaque non sine causâ distulerimus hactenus tibi denominationem ascribere; cum Fratribus tamen Nostris nuper deliberatione præhabitâ, te Regem Romanorum de ipsorum consilio nominamus. Causas autem salubris dilationis; immò potius consultæ accelerationis hujusmodi ad totius Orbis, & ad ipsius maximè profuturæ pacem Imperii, ut speramus, dilectus Filius Tridentius Electusc, & Frater Henricusd de Ordine Minorum tuæ Celsitudinis Nuntii non solùm ad veritatis expressionem, sed adhortationis solicitationem aperient, ut in eis doctrinæ speculum exemplaris inspiciens, & salutaris consuetudinis informationem recipiens prudenter satagas in cunctis tuis processibus vitare discordias; vias tuas facere pro posse pacificas, & semitas, quas Princeps pacis, & Rex Regum, & dominantium Dominus docuit, quantum ipse concesserit, pro viribus ambulare. Cæterum cum inchoata feliciter ad ejusdem culmen Imperii tuæ promotionis auspicia non prosecutionis procrastinatione differri, sed festina deinceps consummatione compleri utilitas manifesta suadeat; Serenitatem tuam hortamur, & sincero tibi affectu, & consilio suademus, quatenus sic te præpares, sic disponas, ut cum te ad unctionem, consecrationem, & Imperialis Diadematis coronationem de Nostris recipiendas manibus duxerimus evocandum; ad quod terminum in proximo, prout circumstantiæ pensandæ permiserint, intendimus assignare; non improvisus, sed sicut tanti negotii solemnia exigunt, paratus appareas; & ad præmissa non morosus, sed promptus, & festinus occurrase. Expedit autem, ut aliquos, qui super ejusdem assignatione termini, quid tuæ commoditati congruat; & alias plenè tuam super hoc per omnia voluntatem Nobis insinuare valeant, citò ad præsentiam Nostram mittas.
Datum Lugduni vi. Kalend. Octobris, Pontificatus Nostri Anno Tertio.
-
Bullarium Franciscanum romanorum pontificum, tomus III, n°LVII., p.222
-
(a) Rodulpho: Comiti de Habspurch Helvetiæ Oppido; a quo Augusta Domus Austriaca suum genus ducit.
-
(b) Hucusque detinuit: Electus enim fuerat Rodulphus anno superiore mense Septembri.
-
(c) Tridentinus Electus: Henricus ex Ordine Canon. Regul. S. Augustini assumptus rexit usque ad annum 1289., quo vivere desiit ex Ughello to. 5. Ital. Sac.
-
(d) Fr. Henricus: Knoderer cognomento Isnæ Algoviæ in Svevia natus Lector Theologiæ Moguntino in Cœnobio, ac Præfectus Lucernen. & Basileen. Cœnobiorum fuit multis annis a sac. confessionibus Rodulphi Comitis Habspurgensis, ejusque uxoris, ac familiæ, tandem hoc anno eligitur Episcopus Basileensis modo apud Waddingum ad hunc annum n. 35. legendo, mihi tamen suspecto, de quo videatur epistola Ne Celsitudinem &c. anno sequenti.
-
(e) Occurras: Quod tamen nunquam postea factum est.