Description
-
Clément IV (1265-1268)
-
Ut contra hæreticam pravitatem duos Inquisitores instituat in Venetis, Marchia Tarvisina, aliisque vicinis Civitatibus cum auctoritate &c. (Ex Autographo in Archivo Conventus Sancti Firmi majoris Veronen.)
-
Anno 1265. die 20. Novembris.
-
1265
-
CLEMENS &c.
Dilecto filio ‥ Ministro Provinciali Fratrum Ord. Minorum in administratione Marchiæ Tarvisinæa Sal., & Ap. Ben.
Licet ex omnibus Mundi partibus, quæ Christiana Religione censentur, ex Officii nostri debito extirpare lætiferam pestem hæreticæ pravitatis; in Italia tamen imminet Nobis hæc sollicitudo propensius, ubi eamdem pestem propter malitiam temporis, quæ in detrimentum Fidei Catholicæ perversa genimina germinavit ex vicinitate persensimus abundantius sucrevisse. Cupientes igitur in Venetiis, Marchia Tarvisina, necnon Forojulensib, Feltrensi, & Bellunensic, Concordiensid, Cenetensie, Civitatis Novæf, Torcellensi, Caprulensi, Clugiensi, Adriensig Civitatibus, & Diœcesibus per aliquos de Fratribus tui Ordinis partem super hoc nostræ sollicitudinis adimpleri. Discretioni tuæ per Apostolica scripta firmiter præcipiendo mandamus, quatenus de consilio aliquorum discretorum Fratrum ipsius Ordinis eligas duos de Fratribus ejusdem Ordinis tuæ administrationis idoneos ad hujusmodi opus Dominicum exequendum; eisque in virtute obedientiæ districtè Apostolica auctoritate procures, ut Inquisitionis Officium in locis prædictis contra hæreticos, credentes, fautores, defensores, & receptatotes eorum juxta formam in aliis nostris litteris expressam, quas Fratribus prædicti Ordinis Inquisitoribus hujusmodi pravitatis in eisdem locis deputatis auctoritate Apostolica, & in posterum deputandis, non expressis aliquorum nominibus, super exequendo dicto Inquisitionis Officio destinamush, exequi studeant diligenter. Nos enim prædictos duos Fratres, quos ad hoc elegeris, & utrumque ipsorum præfatum Officium exequi juxta formam in literis ipsis expressam, ac ipsos illam potestatem, & auctoritatem plenariè habere volumus, quæ in eisdem literis continetur. Si verò tu, vel Vicarius tuus te absente aliquem Inquisitorum hujusmodi ex aliqua fortè causa nonnunquam fortè videritis amovendum, ipsum amoveatis, & substituatis loco ejus alium, quem similem potestatem, & auctoritatem habere volumus, quoties vobis deliberatione cum aliquibus discretis Fratribus dicti Ordinis præhabita, hoc fore videbitur faciendum. Etsi aliquem, vel aliquos Inquisitorum ipsorum decedere fortè contigerit, Nos substituendi de consilio aliquorum discretorum Fratrum ejusdem Ordinis alium vel alios loco illius, vel illorum, qui decesserint, ita quod hujusmodi substituti eisdem omnino auctoritate, ac potestate fungantur, tibi dictoque Vicario, si tu absens fueris, plenam, & liberam concedimus tenore præsentium facultatem.
Datum Perusii xii. Kalendas Decembris, Pontificatus Nostri Anno Primo.
-
Bullarium Franciscanum romanorum pontificum, tomus III, n°LVI., p.58
-
(a) Marchiæ Tarvisinæ: Pars nunc Provinciæ Venetæ, seu S. Antonii.
-
(b) Forojuliensi: Vulgo Cividal del Friuli, eoque nomine venit Aquilejensis, quod id temporis ibi Patriarcha Aquilejæ sedem haberet, quam postea Utinum transtulit, ut in alio Opere fusius ostendetur.
-
(c) Feltrensi, et Bellunensi: Civitatibus tunc unitis.
-
(d) Concordiensi: Jampridem dirutæ, cujus Episcopus, & Inquisitor morantur apud Portum Gruarum al. Romatinum.
-
(e) Cenetensi: Cujus Episcopus partim Cenetæ, partim Coneglani, Inquisitor vero Coneglani moratur.
-
(f) Civitatis novæ: Al. Heracleæ in ora maris Veneti seculo xv. unitæ Patriarchatui Gradensi nunc Veneto.
-
(g) Adriensi: Patavien., Veronen., & Vicentin. postea accesserunt, cujus Episcopus modo Adriæ, modo Rhodigii, Inquisitor autem semper Rhodigii moram ducit.
-
(h) Destinamus: Quæ litteræ tametsi non apparent, non dubitandum tamen, quin idem continerent, ac illæ hoc ipso anno diebus 17. & 24. Septembris datæ Inquisitoribus hæreticæ pravitatis Provinciarum Romanæ, & S. Francisci, ac insequenti anno die 28. Decembris Inquisitoribus Marchiæ Anconitanæ mutatis mutandis.