Description
-
Urbain IV (1261-1264)
-
Fidei Censoribus, ut quæ munus S. Officii spectant, ad Cardinalem S. Nicolai in Carcere Tulliano deferant. (Ex Archivo Bononien.1, Mediolanen. S. Eustorgii, & Cremon. Ord. Prædicat., atque Bullario ejusdem Ord. to. 1. p. 434. Bul. 33. Urb. IV.)
-
Anno 1262. die 2. Novembris.
-
1262
-
URBANUS &c.
Dilectis filiis Fratribus Ordinis Prædicatorum Inquisitoribusa hæreticæ pravitatis in Lombardia, & Marchia Januensi deputatisb auctoritate Apostolica, & in posterum deputandis Salutem, & Apostolicam Benedictionem.
Cupientes, ut negotium Catholicæ Fidei vobis Sedis Apostolicæ auctoritate commissum, & in posterum committendum feliciter in vestris manibus prosperetur; volumus, & præsentium vobis auctoritate districte præcipiendo mandamus; quatenus in negotio eodem de Divino, & Apostolico favore confisi diligenter juxta formas super eo vobis traditas procedentes periculosa, & gravia impedimenta, quæ in prædicto negotio vobis emerserint, dilecto filio nostro Tit. S. Nicolai in Carcere Tulliano Diacono Cardinalic, quem eidem præfecimus negotiod, significare curetis; super aliis vero impedimentis quibuslibet, quæ sive ex defectu sociorum, sive alias ex quacunque causa vobis in ipso negotio emergere forte contigerit, & personaliter, si opus fuerit, ad Cardinalem recurratis eundem; & per litteras vestras, seu Nuncios secure ipsi Cardinali omnia intimare curetise; ut Nos per eum sufficienter super præmissis instructi contra impedimenta hujusmodi provideamus de remediis opportunis: nostræ namque firmæ, ac stabilis intentionis existit, ut quibuslibet obstaculis, ac impedimentis omnino submotis dictum negotium, quod plurimum insidet cordi nostro, felicem habeat Domino auctore progressum ad laudem & gloriam Divini Nominis, & Christianæ Religionis augmentum.
Datum apud Urbem veterem iv. Nonas Novembr. Pontific. Nostri Anno ii. f
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XLIII., p.453
-
Ex Archivo Bononien.: Teste Franc. Pegna par. 3. Directorii Inquisit. Comment. xi.
1 -
(a) Ordinis Prædicatorum Inquisitoribus: Et in eumdem modum credimus dedisse litteras Pontificem etiam Ordinis Minorum Inquisitoribus; etsi illæ litteræ non extent, aut adhuc lateant; quando hæ non fuerint utriusque Ordinis Inquisitoribus directæ; cum diplomatum illius Ordinis Collector consueverit dumtaxat nomina, & res ad suum Ordinem attinentes exscribere; ut alias visum est: neque enim verisimile videtur, Pontificem uni concessisse, alteri vero, quod utrisque commune erat, ac pene necessarium, denegasse; præsertim cum Oldoinus infra laudandus asserat, id factum, ne Inquisitoribus Italiæ: aliarumque Provinciarum opus esset gravibus difficultatibus occurrentibus Summum Pontificem adire: viderat igitur ille Pontificias litteras universis hæret. pravit. Inquisitoribus transmissas, vel certe ab aliis relatas.
-
(b) In Lombardia, et Marchia Januensi deputatis: Secundum novam Innocentii IV. dispositionem Provinciarum Italiæ pro dictis Fidei Censoribus anno 1254. 4. Kalend. Junii factam per litteras incip. Licet ex omnibus &c. in Bullario prædicti Ordinis Prædicator. tom. 1. Bul. 331., vel alias incipien. Cum super Inquisitione &c. datas eodem anno iv. Nonas Junias ibidem Bulla 335. pag. 246. & 248.
-
(c) Diacono Cardinali: Nempe Joanni Cajetano Ursino; quem Pontifex, (inquit Oldoinus in Addit. ad Opus Ciaccon. tom. 2. in Vita Urbani IV. sub an. 1261. pag. 115.) Inquisitorum omnium caput, & quasi patronum constituit, ne Inquisitoribus Italiæ, aliarumque Provinciarum opus esset gravibus occurrentibus difficultatibus Summum Pontificem adire, sed per litteras Cardinalem consulerent, qui graviora quæque cum ipso Pontifice consultaret. Hic autem Cardinalis anno sequenti factus est Ordinis Minorum Protector, & tandem Summus Pontifex Nicolaus III. appellatus.
-
(d) Eidem præfecimus negotio: Sed litteræ hujus præfecturæ desiderantur, ex quibus plane liqueret, an istis tantum, vel omnibus Inquisitoribus præesse deberet.
-
(e) Ipsi Cardinali omnia intimare curetis: Consuli poterit epistola 29. Cum sicut ex litteris &c. hoc anno die 6. Maji Fr. Andreæ Tudertino O. M. Inquisitori in Umbria scripta; & Petitio vestra &c. Nicolai III. anno 1278. 20. Junii data.
-
(f) Omnium primus Franc. Pegna par. 3. Directorii Inquisit. Comment. xi. testatus est, se diploma hoc authenticum vidisse in Bononiensi Inquisitorum Tabulario; & Ludovicus Parama de Orig. Inquisit. tit. 2. cap. 1. num. 11. adjecit Clementem IV. loco Cardinalis S. Nicolai in Carcere Tulliano instituisse Cardinalem Guilelmum Tolosanum, & Nicolaum III. Cardinalem Latinum Ursinum suum Nepotem; de quibus tamen non proferuntur diplomata; sed Parama decipitur, uti solet; cum ex cit. Nicolai III. epist. constet, anno 1270. post obitum Clementis IV. adhuc Card. Jo. Ursinum fuisse Inquisitioni hæret. pravit. Præfectum.