« bullarium-franciscanum-1388 »

ALEXANDER &c.

Dilectis filiis Fratribus de Ordine Minorum in Terris Saracenorum, Paganorum, Græcorum, Bulgarorum, Cumanorum, Æthiopum, Syrorum, Yberorum, Alanorum, Gazarorum, Gothorum, Zichorum, Ruthenorum, Jacobitarum, Nubianorum, Nestorianorum, Georgianorum, Armenorum, Indorum, Moscelinoruma , Tartarorum, Hungarorum, Majoris Hungariæb , Christianorum captivorum apud Turcasc , aliarumque Infidelium Nationum Orientis, seu quarumcumque partium proficiscentibus Salutem, & Apostol. Benedictionem.

Cum hora jam undecima diei sit hominibus, ut exeant ad opus usque ad Mundi vesperam deputata; & illud Apocalypsis elogium cito credetur cum Matris Ecclesiæ consolatione complendum, videlicet, oportere viros spirituales vitæ munditiam, & intelligentiæ gratiam cum Joanne sortitos populis, & gentibus, linguis, Regibusque multis denuo prophetare; quia non sequetur reliquiarum Israel per Isajam prophetata salvatio, nisi juxta Paulum Apostolum prius introeat gentium multitudo. Nos licet immeriti super Apostolicæ Sedis speculam constituti fideliter, ac prudenter dispensandis Dei mysteriis, & operibus coadjuvandis intendimus; si vergente plenitudine temporis; post pia priorum studia in vineam Domini Sabaoth novos, & pene novissimos, qui sapientiam longum didicere per otium, operarios mittere procuremus. Vos igitur, quos juxta professæ Religionis officium zelus comedit animarum; & in quadriga quarta, quam variis carismatum donis, & Fidei fortitudine trahitis; ubique discurrere, ac vexillum Regis gloriæ procul levare gestitis, ad gentes, quæ Jesum Christum Dominum non cognoscuntd; & ad subtractionis filios, qui Sacrosanctæ Romanæ Ecclesiæ non obediunte, destinamus, vobis in remissionem peccatorum omnium injungentes, quatenus seminaturi super aquas multas in illo tantum, qui Mundum dixit se vicisse, confisi, ad illuminationem cœcæ multitudinis, exterminium hæreticæ falsitatis, ad confirmandos nutantium animos, & Fidelium confortandos in luce sermonis, & certitudine operis propositum vobis iter sine quorumlibet offensione curratis. Ut autem Ministerium vestrum honoretur plenius, & honorabilius impleatur; præsentium vobis auctoritate concedimus; ut in Terris, quæ adhuc Sedis Apostolicæ Magisterio non intendunt, proponere verbum Dei; & constitutis ibidem, non obstantibus, si aliqua sunt excommunicatione ligati, in verbis, officio, & cibo, ac in aliis secure communicare; & ipsos, seu etiam alios converti ad unitatem Christianæ Fidei cupientes recipere, baptizare, & aggregare Ecclesiæ filiis valeatisf; & Presbyteri ex vobis ipsos aggregatos possint insignire charactere Clericali, & ipsos ad Acolytatus Ordinemg promovere. Liceat etiam vobis ibidem redeuntibus ad obedientiam Sedis Apostolicæ, qui sunt excommunicatione ligati, absolutionis beneficium juxta formam Ecclesiæ impertiri; & super eo dispensare cum ipsis, quod sacros receperunt Ordines, & Divina celebrarunt Officia sic ligati. Hoc ipsum vobis sit licitum, circa illos de terris eisdem, qui temporibus indebitis, vel infra ætatem legitimam, aut qui omnes eadem die, vel qui superiores prætermissis inferioribus conferre, seu recipere Ordines præsumpserunt: si tamen in hoc servata forma talis extiterit, per quam Ordines recepissent. Vobis præterea dispensare licet, ut illi ex Nationibus vestræ prædicationi commissis, qui post susceptionem sacrorum Ordinum, vel in gradibus, & casibus a Divina minime lege prohibitish matrimonia contraxerunt, remaneant in eisdem; necnon quod Clerici Nationum ipsarum publice ad obedientiam Sedis Apostolicæ redeuntes gaudeant privilegio Clericali. Sit etiam vobis licitum, omnium Fidelium in Terris prædictis confessiones audire, ac ipsis injungere pœnitentias salutares; & excommunicatos a Canonei, vel alio modo juxta formam Ecclesiæ absolvere; dummodo injuriam, & damna passis satisfaciant competenter: cum irregularibus autem partium earum in illis casibus, in quibus solent Legati Sedis Apostolicæ dispensare; ac etiam cum Clericis ipsarum partium patientibus defectum natalium, dummodo non sint de adulterio, vel de incestu, aut de Regularibus procreati, sit vobis dispensandi facultas; quam circa illos similiter habeatis, qui ab unitate Ecclesiæ Catholicæ, seu Religione, vel Clericali Ordine discesserunt, si humiliter redire voluerint, & digne satisfaciant de commissis: ita quod ipsi Religiosi ad sua loca, salva disciplina Ordinis, resumantur; & illos ex jam dictis, qui excommunicationis vinculo sunt astricti, juxta præmissam formam, & prædictæ satisfactionis modum absolvere valeatis: & cum irregularibus ex eisdem, sicut expressum superius, dispensare. Ad hæc, sit vobis facultas absolvendi occisores Clericorum, & Religiosarum personarum in prædictis partibus constitutos: fundandi de novo ibidem Ecclesias, & reconciliandi illas, quæ sunt casu aliquo prophanatæ: ac de novo fundatis Rectores idoneos providendi; & illis, qui de gentibus, vel Schismaticis noviter sunt conversi, dandi licentiam, ut uxores suas, cum quibus ex gradibus a lege Divina non prohibitis contraxerunt, valeant retinere. De causis matrimonialibus, quas in partibus illis ad audientiam vestram deferri contigerit, legitime cognoscendi, ac discordantes inter se ad invicem quoad pacem, & concordiam redeant: necnon quod inordinate viventes de suis excessibus (sicut justum fuerit) satisfactionem exhibeant, compellendi per censuram Ecclesiasticam vobis libera sit potestas. Insuper in locis, in quibus vos hospitari contigerit; vel in locis partium earumdem, in quibus residentiam facietis, Missam, & cætera Divina Officia celebrandi, & in eisdem partibus Cœmeteria benedicendi, ac dandi Indulgentias, commutandi vota facultatem, & licentiam habeatis. Ceterum vobis concedimus, quod a Catholicis Patriarchis, Archiepiscopis. & Episcopis possitis Ordines, & alia Ecclesiastica Sacramenta susciperej; ac vestes Sacerdotales, Altaris Pallas, & Corporalia per vos, qui ex vobis sunt Presbyteri, cum necesse vobis fuerit, benedicere; ubi Catholicorum Episcoporum copia non habetur; nec non alia facere, quæ ad augmentum Dominici nominis, & ampliationem Catholicæ Fidei, ac reprobationem, & irritationem illorum, qui sacris traditionibus contradicunt, sicut pro loco, & tempore videritis expedire. Nulli ergo &c. nostræ concessionis infringere, vel ei ausu &c. Si quis autem &c.

Datum Viterbii xiii. Kalendas Maji, Pontificatus Nostri Anno Quartok.