« bullarium-franciscanum-1387 »

ALEXANDER &c.

Venerabili Fratri ...a Archiepiscopo Rothomagen.b Sal., & Ap. Ben.

De providentia, & maturitate tua obtinentes certitudinem pleniorem vitare non possumus, quin te sæpius in grandium negotiorum, & aliorum, quæ frequenter in illis emergunt partibus, commissione gravemus firma credulitate tenentes, quod ea, quæ tibi committimus, prospere, ac salubriter tuæ circumspectionis studio dirigantur. Sane illa singularis dilectio, quam ad famosum Regnum Franciæ, ejusque Prælatos, ac Proceres gerimus, sic Nos circa ea, quæ ipsius Regni profectum, ac eorumdem Prælatorum, & Procerum honorem respiciunt; reddit jugi meditatione vigiles; & indefessa sollicitudine sic intentos; ut nec torpeamus in iis alicujus negligentiæ somno; nec quantæcumque attentionis studio fatigemur; quinimmo inter alia, quæ Nobis consideranda imminent, & cogitatione circa hæc versamur sedula, & quo diligentius pensamus in eis, eo accendamur ferventius erga ipsa; maximo namque desiderio prædictorum Prælatorum, & Procerum quietem appetimus; omnique salubrem, & prosperum Regni præfati statum affectione zelamur: & licet ad diversa & ardua ex Apostolatus officio variis, profundisque cogitationibus intendamus assidue; istorum tamen considerationi eo attentius imminemus, quo affectu majori angimur circa illa, pro quibus etiam a pensatione subducimur aliorum. Verum quia intelleximus, quod instigante humani generis inimico gravis inter quosdam ex ipsis Prælatis ex parte una, & nonnullos Barones ejusdem Regni ex altera, quod dolentes referimus, discordia est exortac; cum & dicti Prælati quædam indebita, & injusta petere ab ipsis Baronibus, iidemque Barones prædictis Prælatis super quampluribus articulis valde molesti, & injuriosi esse dicantur: Nos toto mentis cupientes affectu, ut dissidii fomes extinguatur; in eis scandali tollatur occasio, ac omnis discordiæ materia penitus extirpetur, quatenus dilectionis & pacis conjuncti nexibus in seipsis suavem, & salubrem pacis fructum in propriis degustent commodis; sed ad alios ipsius dulcedinem effundant laudabiliter per exemplum; habito super iis Fratrum nostrorum cum multa deliberatione consilio, volumus, & Fraternitati tuæ per Apostolica scripta districte præcipiendo mandamus, quatenus illos Prælatos, qui hujusmodi controversiam cum prædictis Baronibus habere noscuntur, ad aliquem communem locum, ubi melius tibi videbitur expedire, auctoritate nostra convocare; certumque ipsis diem, quo personaliter in eodem loco conveniant, assignare procures, requirens ex parte nostra charissimum in Christo Filium nostrum ... Illustrem Regem Franciæd pacis & justitiæ zelatorem, ut omnibus illis Baronibus, quos hujusmodi contingit negotium, districte præcipiat, ut similiter ad prædictum locum eodem die personaliter studeant convenire. Postquam vero tam Prælati, quam Barones prædicti ad locum convenerint, quem ad hoc duxeris deputandum; tu, in cujus labiis infusam esse credimus celitus gratiame, ut scias necessarium proferre sermonem tempore opportuno; & qui ex dono cælesti nosti specialiter discordiarum eradicare zizania; & serere semen pacis, mutuisque offensionibus provocatos congruis exhortationibus, & inductionibus salubribus complacare; tractes inter eos de pace, ac concordia, diligenter omnem ad hoc, ut amicabilis inter eos compositio intercedat, efficacem opem & operam adhibendo. Ita quod per tuæ diligentiæ studium, gratia cooperante Divina, procul depulsis odiis, abjectisque rancoribus pacentur eorum mentes; concilientur corda; serenentur pectora; & voluntates unanimiter socientur; tuque crescas exinde meritis apud Deum, penes Nos gratia, & apud homines clara fama. Si vero, quod absit, pax inter eos tua mediante sollicitudine non poterit provenire; Nos sperantes, ac etiam intendentes, quod ex tua circa Prælatos, & Regia erga Barones ipsos coertione discordantia eorumdem Prælatorum, & Baronum corda necessitate laudabili reconcilientur, & reducantur ad pacem; volumus & Prælatos ipsos, quod ab omnibus, quæ injuste, ac indebite a prædictis Baronibus eos petere tibi constiterit, omnino desistant, auctoritate nostra, remoto cujuslibet appellationis impedimento, compellas; non obstante, si ipsis, vel ipsorum alicui a Sede Apostolica sit indultum, quod interdici, suspendi vel excommunicari, quodque extra suas Dioceses, aut alia certa loca evocari non possint per litteras Apostolicas plenam & expressam non facientes de indulto hujusmodi mentionem; & constitutione de duabus Dietis edita in Concilio Generalif: & Regem requiras eumdem, ut prædictos Barones ab omnibus eorumdem Prælatorum vexationibus, injuriis, & molestiis, quantum ad eum pertinet, tradita sibi a Domino potestate compescat; Ita quod spiritualis, & temporalis potestate gladii partium motus illicitos, & indebitos coercente, pax, & concordia inter eas auctore Domino necessario reformetur. Taliter igitur præceptum, & mandatum super hoc Apostolicum studeas adimplere; ut de prompta possis devotione non immerito commendari.

Datum Viterbii Idibus Aprilis, Pontificatus Nostri Anno Quartog.