« bullarium-franciscanum-1383 »

ALEXANDER &c.

Dilectis in Christo filiabus ‥ Abbatissæ, & Conventui de Gattajolaa Ordinis S. Damiani Lucanæ Diœcesis Salutem, & Apostolicam Benedictionem.

Ea, quæ judicio, vel concordia terminantur, firma debent, & illibata persistere; & ne in recidivæ contentionis scrupulum relabantur, Apostolico convenit præsidio communiri. Sane Plebano de Birbinaria Lucanæ Diœcesis super provisione vestra de aliquo Monasterio, vel loco ipsius Diœcesis Lucano Episcopo non subjecto, deformato, & de facili non valente in suo reformari Ordine facienda, nostris a Nobis sub certa forma litteris destinatisb; & super statu Monasterii de Ficeclo ad Romanam Ecclesiam immediate spectantis Ordinis Vallis Umbrosæ, ac moribus, & vita Abbatis, & quinque Monachorum degentium in eodem pluribus Testibus ab eodem Plebano receptis auctoritate hujusmodi litterarum; tandem ipsi Plebano per alias litterasc dedimus in præceptis, ut ipsorum Abbatis, & Conventus, ac Personarum cavillationibus, & tergiversationibus non indulgens, si ex dictis receptorum Testium fama, aliisque adminiculis deformationem ejusdem Monasterii deprehenderet; & ex qualitate personarum ejusdem Monasterii attenderet illud ex eisdem personis non posse de facili reformari; ad concedendum ipsum cum juribus, & possessionibus suis Abbatissæ, & Conventui præfatis juxta priorum continentiam litterarum absque solemnitate, & strepitu judiciarii ordinis inducendum eos, vel Procuratorem ipsarum in corporalem possessionem eorum procedere procuraret: contradictores per censuram Ecclesiaticam, appellatione postposita, compescendo. Et quia hujusmodi provisionis negocium per ipsius Plebani negligentiam videbatur nimium prorogari: dilecto filio Gualterotto Canonico Lucano primo in virtute obedientiæ, ac tandem sub pœna suspensionis ab officio, & beneficio per nostras duximus litterasd injungendum, ut in negotio ipso ejusdem Plebani servato processu, sequens dicta receptorum testium, formam, & alia legitima adminicula, prætermissa difficultate judiciarii Ordinis, & per officium vestrum dictis Abbati, & Monachis protelandi negocium qualibet difficultate sublata, finaliter procedere procuraret juxta directarum eidem Plebano continentiam litterarum; propter quod idem Gualterottus super processu coram se, & dicto Plebano diligenti examinatione præmissa; visis, & inspectis depositionibus Testium ab utraque parte in negocio hujusmodi productis; & auditis allegationibus Partium earumdem; communicato etiam consilio cum Peritis, præfatum Monasterium de Ficeclo deformatum esse, & de personis prædictis non posse de facili reformari; & ideo illud vobis concedendum fore definitive pronuncianse illud vobis cum omnibus possessionibus, juribus, & pertinentiis suis dedit, & concessit perpetuo retinendum; Abbatem, & personas in ipso degentes amovens per sententiam ab eodem (latam). Cumque propter hoc pro parte dictorum Abbatis, & Monachorum fuisset ad nostram audientiam appellatum; Venerabilis Frater noster Episcopus Prænestinusf, quem super hoc dedimus Partibus auditorem, lite legitime contestata, juramento de veritate dicenda hinc inde præstito; actis prioris judicii plenius recensitis; auditis allegationibus partium; habitaque a Nobis de sententia proferenda licentia speciali, prædictum Gualterottum bene, ac legitime juxta formam sibi traditam pronunciasse, & pro parte prædictorum Abbatis, & Monachorum male appellatum fuisse finaliter definivitg; prout in Instrumento publico, & litteris ipsiush Episcopi sigillo munitis inde confectis plenius continetur. Nos igitur vestris supplicationibus inclinati, quidquid per Gualterottum; & Episcopum supradictos in hac parte factum est, ratum habentes, & gratum, id, non obstante appellatione pro parte Abbatis, & Monachorum a sententia dicti Episcopi ad nostram audientiam interjecta, quam reputamus frivolam, auctoritate Apostolica confirmamus, & præsentis scripti patrocinio communimus. Tenorem ipsius Instrumenti, ac præfatarum litterarum de verbo ad verbum præsentibus inseri facientes. Tenor enim Instrumenti præfati talis est.

In nomine Domini. Amen. Placuit Summo Pontifici scribere Plebano de Birbinaria in hac forma: Alexander Episc. &c.i

Nulli ergo &c. nostræ confirmationis infringere &c.

Datum Viterbii xv. Kalen. Aprilis, Pontificatus Nostri Anno Quartoj.