« bullarium-franciscanum-1309 »

ALEXANDER &c.

Dilecto filio Gualterotto Canonico Lucan. Salutem, & Apostol. Benedictionem.

Dudum Plebano de Birbinaria Lucan. Diœcesis super provisione dilectis in Christo filiabus Abbatissæ, & Conventui Monasterii de Gattajola Ordinis S. Damiani ejusdem Diœcesis Lucan. Episcopo non subjecto, deformato, & de facili non valente in suo reformari Ordine facienda, nostris a Nobis sub certa forma destinatis litterisa; & super statu Monasterii de Fiscedob ad Romanam Ecclesiam immediate spectantis Ordinis Vallis Umbrosæ, ac moribus, & vitæ Abbatis, & quorumcumque Monachorum, ut dicitur, degentium in eodem. Cum ipsi per appellationis effugium inspectoris oculis, tempusque redimere, ac longis litigiorum perturbationibus evitare judicium niterentur; testibus pluribus ab eodem Plebano receptis; auctoritate harum literarum tandem ipsi Plebano per alias dedimus litterasc in præceptis, ut ipsorum Abbatis, & Conventus, & personarum cavillationibus, & tergiversationibus non indulgens, si ex dictis receptorum testium, fama, aliisque adminiculis deformationem ejusdem Monasterii deprehenderet; & ex qualitate personarum ejusdem attenderet illud ex eisdem personis non posse de facili reformari, ad concedendum ipsum cum juribus, & possessionibus suis Abbatissæ, & Conventui præfatis juxta priorum continentiam litterarum, absque solemnitate, & strepitu judiciarii Ordinis inducendum eas, vel partem earum in corporalem possessionem eorum, & defendendum inductas, invocato ad hoc, si necesse fuerit, auxilio brachii Sæcularis, submoto cujuslibet moræ, ac difficultatis dispendio, oppositione remota procedere curaret; Contradictores per censuras Ecclesiasticas, appellatione posposita compescendo. Et ne idem Monasterium dilapidari contingeret, ubi expedire videret, publicæ prohibitionis Edictum proponeret, ne quis ab eisdem Abbatibus, & Monachis sub quovis alienationis, vel obligationis titulo præsumeret accipere bona Monasterii supradicti; & decerneret, quod si secus attentari contingeret, non tenere. Non obstantibus aliquibus litteris veritati, & justitiæ præjudicantibus, a Sede Apostolica impetratis, vel etiam impetrandis. Quia igitur hujusmodi provisionis negotium in grave præfati Monasterii detrimentum per memorati Plebani negligentiam, desidiam, & malitiam, quam non deseremus authore Domino indiscussam, nimium prorogatur; Nos de tuæ circumspectionis industria plenam in Domino fiduciam obtinentes per Apostolica tibi scripta in virtute obedientiæ districte præcipiendo mandamus, quatenus in negotio ipso ejusdem Plebani servato Processu sequens dicta receptorum testium, famam, & alia legitima adminicula, prætermissa difficultate judiciarii ordinis, & per officium nostrum dictis Abbati, & Monachis protelandi negotium, qualiter difficultate sublata, finaliter procedere studeas juxta directarum eidem Plebano continentiam litterarum.

Datum, ut supra.d