« bullarium-franciscanum-190 »

GREGORIUS &c.

Dilectis in Christo filiabus … Abbatissæ Monasterii Sancti Pauli Spoletan. a , ejusque Sororibus tam præsentibus, quàm futuris Regularem vitam professis in perpetuum Salutem, & Apostolicam Benedictionem.

Religiosam vitam eligentibus &c.b Præterea quascumque possessiones, quæcumque bona idem Monasterium in præsentiarum justè, & canonicè possidet, aut in futurum concessione Pontificum, largitione Regum, vel Principum, oblatione Fidelium, seu aliis justis modis præstante Domino poterit adipisci, firma vobis, vestrisque Successoribus, & illibata permaneant. In quibus hæc propriis duximus exprimenda vocabulis, Locum ipsum, in quo præfatum Monasterium situm est, cum omnibus pertinentiis suis; Vineas eidem Monasterio circumadjacentes cum omnibus pertinentiis suis; Terras, & vineas, quas habetis in Majan; Terras, quas habetis in Atteola, Cocorono, & Jano; & alias possessiones vestras cum pratis, vineis, nemoribus, usuagis, pascuis in bosco, & plano, in aquis & molendinis, in viis, & semitis, & omnibus aliis libertatibus, & immunitatibus suis. Liceat quoque vobis personas liberas, & absolutas a seculo fugientes ad conversionem recipere, & eas absque contradictione aliqua retinere. Prohibemus insuper, ut nulli Sororum vestrarum post factam in Monasterio vestro professionem fas sit de eodem loco discedere, discedentem verò nullus audeat retinere. Chrisma verò, Oleum Sanctum, Consecrationes Altarium, seu Basilicarum, & benedictiones Monialium a Diœcesano suscipietis Episcopo, siquidem Catholicus fuerit, & communionem Apostolicæ Sedis habuerit, & ea vobis voluerit sine pravitate aliqua exhibere; alioquin liceat vobis quemcumque malueritis Catholicum adire Antistitem gratiam, & communionem Apostolicæ Sedis habentem, qui Nostra fretus auctoritate vobis, quod postulatur, impendat. Quia verò interdum Diœcesani Episcopi copiam non habetis, si quem Episcopum Romanæ Sedis, ut diximus, gratiam, & communionem habentem, & de quo plenam notitiam habeatis, per vos transire contigerit, ab eo benedictiones Monialium, vasorum, & vestium, & consecrationes Altarium recipere valeatis. Præterea cum commune Interdictum Terræ fuerit, liceat vobis, clausis januis, excommunicatis, & interdictis exclusis, non pulsatis campanis, submissa voce Divina Officia celebrare, dummodo causam non dederitis Interdicto. Obeunte verò te nunc ejusdem loci Abbatissa, vel tuarum qualibet succedentium, nulla ibi qualibet subreptionis astutia, seu violentia præponatur, nisi quam seniores communi consensu, vel earum major pars consilii sanioris secundum Deum, & Beati Benedicti Regulam providerint, eligendam. Cum autem ad exhortationem nostram, dum adhuc essemus in minori officio constituti, totaliter Domino vos dicantes Claustro perpetuo vos duxeritis includendasc, propter quod dignum est, ut sicut in Religione crevistis, in libertate crescatis; statuimus, ut sine speciali mandato Sedis Apostolicæ non possit Spoletanus Episcopus in dictum Monasterium, & personas consistentes in ipso Interdicti, vel excommunicationis sententiam promulgare, vel aliàs jurisdictionem Ecclesiasticam exercere; sed tantùm annuo censu quatuor solidorum Lucensium, & Sacramentis Ecclesiasticis, quæ sibi reservanda duximus, sit contentus &c.d

Datum Perusii per manum Fratris Joseph Ordinis Floren. Notarii Domini Gregorii Papæ Noni viii. Kalendas Maji, Indictione viii. Incarnationis Dominicæ Anno Mccxxxv. Pontificatus verò ejusdem Domini Gregorii Anno Nonoe.