Description
-
Martin V (1417-1431)
-
XII kalendas septembris, anno nono
-
-
Genazzano
-
Titre, général (littere gratiose, cum filo serico)
-
[Registre] R. CITÉ DU VATICAN, Archivio segreto Vaticano, Registra Vaticana 355, fol. 298v. Mention hors teneur : Collat : per me Antonium. Johannes Stalberg.
-
Noël Valois, Histoire de la Pragmatique Sanction de Bourges sous Charles VII, Paris : A. Picard et fils, 1906, n. 23, p. 42-44 [en ligne], d’après R.
-
Bulle de Martin V annulant toutes censures ou privations de bénéfices dont des partisans de Charles VII auraient été victimes comme ne résidant pas en leurs bénéfices situés en l'obédience anglaise.
-
Martinus etc., ad futuram rey memoriam1.
Preclare devotionis sinceritas quam carissimus in Christo filius noster Carolus, rex Francorum illustris, ad nos et Sedem apostolicam habere dinoscitur promeretur ut petitiones suas, in hiis presertim per que personarum ecclesiasticarum suorum regni Francie et Dalphinatus Viennensis statui et tranquillitati consulitur illarumque molestiis et vexationibus obviatur, ad exauditionis gratiam admittamus.
Sane pro parte dicti regis nobis nuper exhibita petitio continebat quod nonnulli archiepiscopi, episcopi et alii jurisdictionem ecclesiasticam exercentes, vigore quarundam litterarum apostolicarum que a nobis emanasse dicuntur, nonnullas personas ecclesiasticas seculares et regulares, ecclesias, monasteria, dignitates et alia beneficia ecclesiastica obtinentes, prefato regi fideles, et in gueris et hostilitatibus que in dicto regno, proch dolor ! viguerunt, prout adhuc vigent, adherentes et obedientes eidem regi, tanquam eorum domino naturali, suis ecclesiis, monasteriis, dignitatibus, personatibus, officiis et aliis beneficiis ecclesiasticis, sub colore et occasione non residentie in eisdem, privaverunt et quotidie privare conantur, ac dignitates, personatus, administrationes, officia et beneficia ipsa, tanquam per hujusmodi privationem vacantia, personis aliis contulerunt et conferre presumunt, non advertentes neque considerantes quod propter manifesta pericula personarum suarum in prefatis dignitatibus, personatibus et beneficiis salva fidelitate debita dicto regi, ut asseritur, tute residere, neque ad juditium coram eisdem archiepiscopis, episcopis et aliis jurisdictionem habentibus in dictis partibus prefato regi non obedientibus personaliter comparere non possunt. Quare pro parte prefati regis nobis fuit humiliter supplicatum ut super hiis ipsarum personarum ecclesiasticarum sibi obedientium et fidelium statui et indempnitati paternaliter providere de benignitate apostolica dignaremur.
Nos igitur, qui libenter personarum ecclesiasticarum paci et statui providemus et earum vexationibus et scandalis, quantum cum Deo possumus, obviamus, super premisais oportune providere volentes, hujusmodi supplicationibus inclinati, auctoritate apostolica et ex certa scientia tenore presentium decernimus et etiam declaramus nostre intentionis non fuisse nec esse, nosque non voluisse nec velle quod dicti archiepiscopi, episcopi et alii jurisdictionem ecclesiasticam habentes, vigore quarumcunque litterarum sub quavis forma vel expressione verborum per nos concessarum, deberent aut possent, vel debuerint seu potuerint, aut debeant seu possint quomodolibet in futurum occasione adhesionis, fidelitatis et obedientie prestitarum, ut premittitur, dicto regi, seu non residentie, ut prefertur, ad privationem seu quamvis aliam penam, aut alias, preter et ultra dispositionem juris communis et auctoritatem ordinariam, contra personas predictas procedere quoquo modo. Et nichilominus privationes, amotiones ac processus, sententias ac censuras ecclesiasticas vigore dictarum nostrarum literarum factos, factas et latas et in posterum faciendos, ferendas et promulgandas, necnon collationes et provisiones postmodum substentas, et in posterum etiam, premissorum occasione, pretextu literarum predictarum, aliter quam ut predictum est forsan fiendos, ferendas et fiendas, auctoritate predicta, ex nunc decernimus nullos, irritos ac nullas, irritas et inanes ; quos et quas tollimus et viribus penitus evacuamus, nulliusque existere volumus roboris vel momenti. Non obstantibus constitutionibus apostolicis ac prefatis litteris nostris, quarum tenores perinde haberi volumus pro expressis ac si in presentibus de verbo ad verbum essent inserti, ceterisque contrariis quibuscunque. Nos insuper omnes et singulos excommunicationis, suspensionis et interdicti processus et sententias, quos et quas premissorum occasione contra personas dicto regi obedientes et fideles imposterum promulgari contigerit vel haberi etiam irritos, irritas decernimus et inanes.
Nulli ergo omnino hominum liceat hanc paginam nostre declarationis, cassationis, evacuationis, volumptatis et constitutionis infringere, vel ei ausu temerario contrahirea. Si quis autem hoc attemptare presumpserit, indignationem omnipotentis Dey et beatorum Petri et Pauli, apostolorum ejus, se noverit incursurum.
Datum Genizani, Prenestine diocesis, XII kalendas setembrisb, pontificatus nostri anno nono. -
(a) Sic.
-
(b) Sic.
-
1. En marge : B. de Montepolitiano. Gratis, de mandata domini nostri Pape. Et plus bas : Aliud indultum in dicto regno super beneficiis.
Informations
Document
Laurent
Vallière
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 26817 (aposcripta-3701), http://telma.irht.cnrs.fr/chartes/en/aposcripta/notice/26817 (mise à jour : 29/12/2019).