« aposcripta-3601 »

Celestinus episcopus servus servorum dei dilectis in Christo filiabus Jutte, abbatisse monasterii de Hoven, eiusque sororibus tam presentibus quam futuris regularem vitam professis in ppm. — | Prudentibus virginibus, que sub habitu religionis accensis lampadibus per opera sanctitatis iugiter se preparant ire obviam sponso, sedes apostolica debet presidium impertiri, ne forte cuiuslibet temeritatis incursus, aut eas a proposito revocet, aut robur, quod absit, sacre religionis infringat. Eapropter, dilecte in Christo filie, vestris iustis postulationibus clementer annuimus, et prefatum monasterium de Hoven, in quo divino estis obsequio mancipate, sub beati Petria et nostra protectione suscipimus, et presentis scripti privilegio communimus. In primis siquidem statuentes, ut ordo monasticus, qui secundum deum et beati Benedicti regulam in eodem monasterio institutus esse dinoscitur, perpetuis ibidem temporibus inviolabiliter observetur. Preterea, quascumque possessiones, quecumque bona idem monasterium in presentiarum iuste et canonice possidet, aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci, firma vobis et eis, que vobis successerint, et illibata permaneant. In quibus hec propriis duximus exprimenda vocabulis : locum ipsum in quo prefatum monasterium situm est cum omnibus pertinentiis suis, quicquid habetis in Tulpeto et circa eandem villam, ecclesiam de Rimindeshem cum omnibus suis pertinentiis, domos et redditus quos habetis in Colonia, vineas et agros quos habetis in partibus Moselleb. Sane novalium vestrorum, que propriis manibus aut sumptibus colitis, sive de nutrimentis animalium vestrorum nullus a vobis decimas exigere vel extorquere presumat. Liceat quoque vobis, personas liberas et absolutas, e seculo fugientes, ad conversionem recipere et eos absque contradictione aliqua retinere. Prohibemus insuper, ut nulli sororum vestrarum seu conversorum post factam in loco vestro professionem, fas sit, absque abbatisse sue licentia de eodem loco discedere, discedentem vero absque communium litterarum cautione nullus audeat retinere. Cum autem generale interdictum terre fuerit, liceat vobis, clausis ianuis, exclusis excommunicatis et interdictis, non pulsatis campanis, suppressa voce divina officia celebrare. Inhibemus etiam, ne quis in vos vel monasterium vestrum sine manifesta et rationabili causa excommunicationis vel interdicti sententiam promulgare seu novis et indebitis exactionibus vos aggravare aliqua temeritate presumat. Sepulturam preterea ipsius loci liberam esse decernimus, ut eorum devotioni et extreme voluntati, qui se illic sepeliri deliberaverint, nisi forte excommunicati vel interdicti sint, nullus obsistat, salva tamen iustitia illarum ecclesiarum, a quibus mortuorum corpora assumuntur. Obeunte vero te, nunc eiusdem loci abbatissa, vel earum qualibet, que tibi successerint, nulla ibi qualibet surreptionis astutia seu violentia preponatur, nisi quam sorores communi consensu vel sororum pars consilii sanioris secundum dei timorem et beati Benedicti regulam providerint eligendam. Decernimus ergo, ut nulli omnino hominum fas sit, prefatum monasterium temere perturbare aut eius possessiones auferre vel ablatas retinere, minuere seu quibuslibet vexationibus fatigare, sed omnia in[tegra] conserventur earum, pro quarum gubernatione ac sus[tenta]tione concessa sunt, usibus omnimodis profutura, salva sedis apostolice auctoritate et diocesani episcopi canonica iustitia. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita, nisi reatum suum congrua satisfactione correxerit, potestatis honorisque sui dignitate careat, reamque se divino iudicio existere de perpetrata iniquitate cognoscat, et a sacratissimo corpore ac sanguine dei et domini redemptoris nostri Jesu Christi aliena fiat, atque in extremo examine divine ultioni subiaceat. Cunctis autem eidem loco sua iura servantibus sit pax domini nostri Jesu Christi, quatinus et hic fructum | bone actionis percipiant et apud districtum iudicem premia eterne pacis inveniant. Amen. Am. Amen.

(R) Ego Celestinus catholice ecclesie episcopus ss. (M)

† Ego Albinus Albanensis episcopus ss.

† Ego Octavianus Hostiensis et Velletrensis episcopus ss.

† Ego Johannes Prenestinus episcopus ss. (6)

— † Ego Pandulfus basilice xii apostolorum presbiter cardinalis ss.

† Ego Johannes tit. sancti Clementis cardinalis Tuscanensis episcopus ss.

† Ego Romanus tit. sancte Anastasie presbiter cardinalis ss.

† Ego Hugo presbiter cardinalis sancti Martini tit. Equitii ss. (3)

† Ego Johannes tit. sancti Stephani in Celio monte presbiter cardinalis ss. (1)

— † Ego Gerardus sancti Adriani diaconus cardinalis ss. (1)

† Ego Gregorius sancte Marie in porticu diaconus cardinalis ss.

† Ego Johannes sancti Theodori diaconus cardinalis ss. (2)

† Ego Lotarius sanctorum Sergii et Bachi diaconus cardinalis ss.

† Ego Nicolaus sancte Marie in Cosmidyn diaconus cardinalis ss. (1)

Dat. Laterani, per manum Egidii, sancti Nicolai in carcere Tulliano diaconi cardinalis. ii Id. Novembr. Indictione x. Incarnationis dominice anno mcxci. Pontificatus vero domni Celestini pp iii anno primo. —