Description
-
Célestin III (1191-1198)
-
Les archevêques, évêques, abbés, prieurs et autres prélats d'églises auxquels ces lettres parviendront
-
II nonas julii, anno secundo
-
-
Latran
-
Mandement (littere cum filo canapis)
-
[Expédition] E. FRANCE, Paris, Archives nationales, L 235/8.
-
Ici reprise de Samuel Loewenfeld, Epistolae pontificum romanorum ineditae, Leipzig : Veit et Comp., 1885, n. 402, p. 247-248.
-
Coelestinus III universis ecclesiarum praelatis mandat, ut populum indulgentia proposita ad collectas in usum Templariorum instituendas adhortentur, cet.
-
Celestinus episcopus, servus servorum Dei, venerabilibus fratribus archiepiscopis, episcopis et dilectis filiis abbatibus, prioribus et aliis ecclesiarum prelatis, ad quos littere iste pervenerint, salutem et apostolicam benedictionem.
Non absque dolore cordis et plurima turbatione didicimus quod ita in plerisque partibus ecclesiastica censura dissolvit et canonice sententie severitas enervatur ut viri religiosi, et hii maxime qui per Sedis apostolice privilegia maiori donati sunt libertate, passim a malefactoribus suis iniuriam sustineant et gravamen, dum vix invenitur qui congrua illis protectione subveniat et pro fovenda pauperum innocentia murum defensionis opponat.
Cum autem dilecti filii nostri fratres militie Templi nuper permittente Domino ab inimicis Christiani nominis graviter sint oppressi et vehementer, sicut vos nosse credimus, barbara sevitia paganorum illos in personis et rebus exhauserit et etiam pro terra sancta de illorum spurcitia liberanda sumptus pertulerint et labores et pro ipso humani generis salvatore animas ponere ac pro fratribus extrema subire pericula non formident, ad benefaciendum ipsis etiam sine sollicitatione nostra merito possetis induci et ad hoc vestros subditos propensius invitare.
Cum autem predicti fratres, sicut universitatem vestram latere non credimus, laudabiliter et assidue pro Salvatoris iniuria vindicanda decertent et vix ad tante militie sustentationem proventus eorum sufficere dinoscantur, pro tanto christianitatis commodo non solum mobilium sed etiam immobilium partem distrahere et in totius christianitatis commodum convertere compelluntur. Hac itaque consideratione inducti et illorum maximis necessitatibus provocati, universitatem vestram presentibus litteris exhortamur, quatinus, unde eorum suppleatur inopia, populum vobis a Deo commissum collectas facere moneatis. Quicunque vero de facultatibus sibi a Deo collatis eis subvenerit et in tam sancta fraternitate se collegam statuerit eique beneficia persolverit, annuatim septimam ei partem iniuncte penitentie confisi de beatorum Petri et Pauli apostolorum meritis indulgemus. Si vero excommunicatus non fuerit vel nominatim interdictus et eum mori contigerit, ei cum aliis christianis sepultura ecclesiastica non negetur.
Cum autem fratres ipsius Templi, qui ad collectam suscipiendam destinati fuerint, in civitatem, castellum vel vicum advenerint, si forte locus ipse interdictus sit, in iocundo eorum adventu semel in anno aperiantur ecclesie et exclusis excommunicatis divina in eis officia celebrentur. Que vero de non excommunicatis eorundem militum fratribus ecclesiastice sepulture tradendis et ecclesiis in eorum adventu, excommunicatis exclusis, se[mel] aperiendis a nobis statuta sunt, vobis archiepiscopis, episcopis, mandando precipimus, ut per vestras parrochias faciatis inrefragabiliter observari.
Preterea fraternitati vestre rogando mandamus quatinus personas eorum et bona pro caritate beati Petri et nostra manuteneatis et nullam eis irrogari lesionem vel iniuriam permittatis.
Datum Laterani, II nonas iulii, pontificatus nostri anno secundo. -
Joachim Rother, Das Martyrium im Templerorden : eine Studie zur historisch-theologischen Relevanz des Opfertodes im geistlichen Ritterorden der Templer, University of Bamberg Press (Bamberger Historische Studien, 16), 2017 [en ligne], p. 371.
Informations
Document
aposcripta
admin
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 20914 (aposcripta-901), http://telma.irht.cnrs.fr/chartes/en/aposcripta/notice/20914 (mise à jour : 17/05/2021).