Description
-
Grégoire IX (1227-1241)
-
Le podestat, le Conseil et la Commune d'Assise
-
XVII kalendas julii, anno nono
-
-
Pérouse
-
Mandement (littere cum filo canapis)
-
[Registre de la chancellerie apostolique] R. CITÉ DU VATICAN, Archivio Segreto Vaticano, Registra Vaticana ... Greg. IX Reg. Vol. V, 39; Lib. IX, 112. Pertzius has litteras in editionem suam integras recipere noluit. Quae in apographo librarii manu confecto desunt, supplevimus ex Theineri Cod. dipl. dom. temp. s. sed. t. I, p. 104, n. 158 [T.], qui item ex Reg. haustas litteras proposuit.
-
Ici reprise de Karl Rodenberg, Epistolae s. XIII e regestis pontificum romanorum selectae, I, Berlin : Weidmann (MGH), 1883, n. 644, p. 538 [en ligne], d'après R.
-
?
-
Potthast, Regesta pontificum Romanorum, n. 9937 [en ligne].
-
Gregorius IX papa potestati, consilio et populo Assisinati de pace in civitate eorum reformanda mandata sua mittit, iisque concedit, ut potestatem et alios officiales libere sibi creare possint.
-
. . potestati, consilio et populo Asisinati.
Inter curas multiplices et pregrandes, quas plus solito, immo preter solitum sustinemus, curam et provisionem patrimonii beati Petri non modicam reputamus, cum ad iurisdictionem nostram noscatur spiritualiter et temporaliter pertinere. Unde posset nobis non immerito imputari, si super provisione ipsius essemus tepidi vel remissi, qui cunctorum fidelium sollicitudinem gerimus pastoralem. Cum enim nuper quidam de civitate vestra, qui dati in sensum reprobum delectantur cum malefecerint, et in rebus pessimis gloriantur, patientia sedis apostolice per insolentiam abutentes, turbare pacem, corrumpere iustitiam et suscitare inter vos scandalum molientes, magnum in civitate ipsa scisma nequiter suscitarint, cuius occasione non solum ad verba et verbera est deventum, set etiam quidam fuere trucidati crudeliter et nonnulli letaliter vulnerati: nos ad reformandam inter vos pacem et pravorum insolentiam in posterum reprimendam quedam vobis duximus iniungenda, que inserta presentibus volumus et precipimus inviolabiliter observari.
In primis siquidem, ut firma pax sit de cetero inter partes et servetur ab eis omni tempore illibata, et potestas seu rectores vel consules, qui erunt pro tempore, iurent et singulos iurare compellant pacem ipsam et universa que inferius continentur firmiter observare; nec unus alteri de discordia seu iniuriis hactenus inter vos habitis improperare presumat, secus agens, si fuerit miles, centum, si de populo, quinquaginta, si mulier, decem librarum penam incurrant. Quod si solvendo non fuerit, banniatur de terra, nec bannum relaxetur huiusmodi absque speciali mandato apostolico seu rectoris, qui fuerit pro tempore in Ducatu; et hoc ponatur in civitatis eiusdem statutis et iuretur a singulis observandum.
Heredibus autem quondam magistri Angeli notarii dentur de bonis communitatis vestre quinquaginta libre Lucensium et totidem heredibus quondam Laurentii, qui pro ipsa discordia fuerunt miserabiliter interfecti. Preterea Thomas Rainerii, Carsedonius, Petrus Cusanus, Petrus Capitanee, Maiolus Barerani, Agrestolus Georgii, Andreas Agrestoli, Iohannes Simeonis, Huguicio de Sancto, Mathias dictus Sfasciatus, Celatus, Paulus et Bernardus notarii, Angelus iudex, Deutacommandus Petri, Andreas Philippi de Induratis, Petrus Guidonis Reguelza, Bettolus Pauli dictus Succannacapra, Albricus notarius filius Huguicionis, Scafilon Golantie, Huguicio Leonardi filius Berarduccii Blance, Tito Angeli Guidi, Bonaiuncta Angagnoli, Gualfredus Mularius et Petrus Corvaglentis, precipui huius discordie incentores, ad nullum eligantur officium civitatis absque licentia sedis apostolice speciali, et si secus actum fuerit, presumpta de ipsis electio nullam habeat firmitatem. Et quod eos, qui honorem ecclesie attendentes civitatem egredi sunt compulsi, cum omnibus bonis suis sub protectione apostolica recepimus speciali, ut ipsi dampnum exinde non incurrant a communitate Asisinate, septingente libre Lucensium pro illatis dampnis et factis expensis tam in Romana curia quam in eundo et redeundo ab ipsis solvantur eisdem.
Sententias, condempnationes, bannimenta omnia facta per Thomasium Rainerii quondam potestatem Asisii et iudicem ipsius contra milites extra morantes et sequaces eorum a tempore electionis facte de Rainerio Cinguli cive Florentino irrita et inania esse decernimus, et illos ad eorum observantiam aliquatenus non teneri, ablatis omnibus occasione huiusmodi integre restituendis eisdem. Nullus preterea eorundem teneatur ad solvendum aliquod debitum, sive solutum fuerit in civitate predicta sive debeat adhuc solvi, seu contractum servandum occasione ipsius discordie, vel ex quocumque contractu alio seu ex quacumque causa, pena, culpa vel modo a tempore premisse electionis usque ad Kalendas Ianuarii proximo nunc transactas, nec quisquam eorum aliquem ad solutionem compellat, et quicquid ab aliquo ipsorum exinde solutum fuerit, sine diminutione qualibet restituatur eidem.
Redditus equorum, quos iuxta consuetudinem civitatis debent recipere a communi, non obstantibus sententiis a G. Fafucii et P. Cusano tempore potestarie prefati T. contra ipsos utpote ab excommunicatis et inimicis capitalibus promulgatis, infra certum tempus prefigendum a nobis sine difficultate qualibet fiat eis, et a creditoribus suis absque omni usurarum exactione vel pena a predictis Kalendis Ianuarii usque ad annum integrum eis indutie concedantur, nec a potestate vel quocumque alio infra idem tempus ad solutionem alicuius debiti cogi possint.
Ad hoc conspirationes, coniurationes, societates, confederationes et colligationes factas vel initas inter vos, generales seu speciales, quocumque modo sive fraude sint inite vel contracte, irritas decernimus et inanes, nec alique fiant de cetero vel serventur absque mandato apostolico speciali vel rectoris in Ducatu pro tempore existentis; contra faciens, si miles fuerit, centum, si de populo, quinquaginta librarum Lucensium pena multetur. Quod si solvendo non fuerit, alias iuxta conditionem quantitatemque persone alia iusta pena plectatur.
Ceterum, quia vos filios reputamus ecclesie speciales, prompti libenter habemur ad gratiam, quam vobis fore perpendimus oportunam. Vestris igitur supplicationibus inclinati, ut in civitate vestra potestatem et alios officiales sicut cetere civitates ducatus Spoletani libere creare possitis, non obstante ordinatione contraria per sedem apostolicam confirmata, vobis auctoritate presentium concedimus facultatem.
Volumus preterea et sub debito prestiti iuramenti districte precipiendo mandamus, quatenus contra iura, dignitatem, honorem et libertatem Romane ecclesie necnon episcopatus Asisinatis, ecclesiarum et clericorum civitatis eiusdem et etiam illorum, qui de civitate ipsa ob premissam discordiam exiverint, nullum fiat de cetero constitutum, et si contra presumptum fuerit, omnino non valeat, sed cassum et irritum habeatur.
Nullus quoque suo vel communitatis nomine se de Monte Subasio excolendo vel alias de cetero aliquatenus intromittat, sed permittat Romanam ecclesiam et rectores Ducatus, qui pro tempore fuerint, eundem montem libere possidere, salvo cuilibet iure suo quod in ipso monte ostenderit se habere. Hoc idem de normandiis, castris, villis et possessionibus communitatis civitatis ipsius, que olim curie fuisse noscuntur, decernimus observandum.
Hec omnia et singula precipimus ab omnibus inviolabiliter observari, mandato sedis apostolice in omnibus semper salvo.
Dat. Perusii, decimo septimo Kal. Iulii, anno IX. -
(a) ?
-
(b) ?
-
(c) ?
-
(d) ?
-
(e) ?
-
(f) ?
-
1. ?
-
2. ?
-
3. ?
-
?
Informations
Document
aposcripta
admin
(IRHT), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 158547 (aposcripta-10987), http://telma.irht.cnrs.fr/chartes/en/aposcripta/notice/158547 (mise à jour : 23/04/2023).