Description
-
Léon IX (1049-1054)
-
L'abbesse du monastère Saint-Fabien et Sainte-Félicité d'Andlau Mathilde
-
1054
-
n.c.
-
Privilège solennel
-
[Original] A. FRANCE, Strasbourg, Archives municipales, non coté.
-
Ici reprise de l'acte n. 600 dans « Chartes originales antérieures à 1121 conservées en France », Cédric Giraud, Jean-Baptiste Renault et Benoît-Michel Tock, éds., Nancy : Centre de Médiévistique Jean Schneider ; éds électronique Orléans : Institut de Recherche et d'Histoire des Textes, 2010 (Telma) [en ligne].
-
Jaffé-Loewenfeld, Regesta pontificum Romanorum, 2 vol., Leipzig, 1885-1888, n. 4195 (1049) [en ligne].
-
Léon IX, pape, confirme à l'abbesse Mathilde les biens et privilèges de l'abbaye d'Andlau.
-
LEO, EPISCOPUS, SERVUS SERVORUM DEI, DILECTȨ IN CHRISTO FILIȨ MATTHILDI, RELIGIosȩ abbatissȩ venerabilis monasterii Sancti Faviani Sanctȩque Felicitatis, quod appellatur Helionis, situm in pago Helisatia, tuisque successoribus abbatissis perpetuam in Domino salutem.
Preclaris votis divina miseratione prestatur effectus. Inde est quod nobis a synodo quam Magontiȩ habuimus, redeuntibus contigit per vestrum monasterium venire et ecclesiam benedicere ac dedicare divino numini quam noviter construxeratis sed nondum perficeratis ad plenum, et etiam vestris precibus illuc transferre corpus beatȩ RICHARDȨ primȩ constructricis ejusdem venerabilis loci, quem per donationis paginam unacum filio suo Karolo imperatore augusto contradidit.
Inter quȩ inclinati vestris intercessionibus ad exemplum predecessorum nostrorum pro futuri temporis cautela necnon stabilitate ejusdem loci concedimus et confirmamus vobis idem monasterium per hoc nostrȩ apostolicȩ auctoritatis privilegium cum omnibus rebus et facultatibus suis quas modo habere videtur, et deinceps auxiliante domino sive a regibus sive a cujuscumque dignitatis et ordinis hominibus quoquo pacto acquirere poterit. Sane in ipso majore altare novȩ ecclesiȩ a nobis consecrato prohibemus alicui sacerdoti missam celebrare nisi quem vos vestrȩque successores voluerint. Ipsum vero monasterium in integrum sicut iam prediximus, concedimus vobis et confirmamus ea ratione ut omnibus diebus vitȩ vestrȩ sub vestra ditione vel regimine sicuti vobis secundum Deum visum fuerit disponere omnino permaneat. Cum autem divina vocatione de presenti hac luce ad Dominum migraveritis statuimus de propria congregatione. Quam sibi unanimitas prefati monasterii ancillarum Dei concorditer elegerit absque cujuscumque hominis contrarietatem vel obstaculo fieri abbatissa. Prestante videlicet nobis et successoribus nostris annualiter tres pannos lineos pontificali usui aptos. Quod si in biennio aut in triennio persolutum non fuerit volumus ut in quarto anno census ipse de annis prȩdictis sub integritate solummodo persolvatur, nec a successoribus nostris aliquid amplius modo quolibet requiratur.
Quapropter presenti decreto jubemus, ut nullus imperator vel regum, aut cujuscumque dignitatis vel ordinis homo audeat sub quolibet obtentu vel occasione prefatum monasterium quod pro amore beatorum apostolorum PETRI et PAULI, ac sempiterna scilicet animȩ suȩ renumeratione prelibata gloriosissima imperatrix RICHARDA unacum carissimo filio suo Karolo serenissime imperatore augusto et quod beato PETRO principi apostolorum per donationis paginam obtulerunt inquietare vel aliquatenus molestare aut ad jus suum vel alienum transferre, sed neque in hominibus ac facultatibus ejus aliqua contradictione aut invasione quoquo tempore facere presumat, sed liceat jamdictis ancilis Dei cum abbatissa propria in Dei omnipotentis servitio quiete vivere, ac sub defensione sanctȩ apostolicȩ cui Dei auctore deservimus ecclesiȩ securiter permanere. Si autem quod absit et fieri non credimus aliquis contra hoc nostrum apostolicum privilegium venire facereve ausu temerario temptaverit perpetui anathematis vincolo innodatus ac perpetua ultione nisi resipuerit maneat condemnatus. Qui autem verus custos ac observator extiterit benedictionis gratiam et misericordiam a domino Deo nostro consequi mereatur.
[rota] [benevalete] (KOM).
Informations
Document
Laurent
Vallière
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 141911 (aposcripta-4811), http://telma.irht.cnrs.fr/chartes/en/aposcripta/notice/141911 (mise à jour : 17/05/2024).