Description
-
Innocent II (1130-1143)
-
Les chanoines de l'église de Crémone et leurs successeurs.
-
IIII Kalendas septembris, indictione X. Incarnationis dominicae anno MCXXXIII.
-
-
Bulle (ad perpetuam rei memoriam)
-
[Inconnu] B. ITALIE, Crémone, Archivio Municipale. Abschrift vom 17 Jahrh.
-
Ici reprise de Julius von Pflugk-Harttung, Acta pontificum Romanorum inedita. Urkunden der Päpste vom Jahre 748 bis zum Jahre 1197, II, Stuttgart : W. Kohlhammer, 1884 [en ligne], n. 311, p. 271-272.
-
Philippe Jaffé, Wilhelm Wattenbach, Samuel Loewenfeld, Ferdinand Kaltenbrunner, Paul Ewald, Regesta pontificum Romanorum ab condita ecclesia ad annum post Christum natum MCXCVIII, 2e éd. Leipzig, : Veit, 1885-1888, 2 vol., n. 7592 [en ligne].
-
Innocenz II nimmt die Domkanoniker von Cremona in apostolischen Schutz und bestätigt ihre Güter und Besitzthümer1.
-
Innocentius episcopus, servus servorum Dei, dilectis in Christo filiis, Cremonensis ecclesiae canonicis, tam prȩsentibus quam futuris, in perpetuum.
Officii nostri nos hortatur auctoritas, pro ecclesiarum statu satagere et earum quieti et utilitati salubriter, auxiliante domino, providere. Dignum namque et honestati conveniens esse cognoscitur, ut, qui ad ecclesiarum regimen assumpti sumus, eas et a pravorum hominum nequitia tueamur, et beati Petri sanctȩ Romanae ecclesiae patrocinio muniamus. Eapropter, carissimi in domino filii, vestris rationabilibus postulationibus benignitate debita prȩbentes assensum, beatae Mariae Dei genitricis ecclesiam, in qua divino vacatis servitio, cum omnibus ad ipsam pertinentibus apostolicae Sedis suffragio communimus. Statuentes, ut quascumque possessiones, quȩcumque bona eadem ecclesia in presentiarum iuste et legitime possidet, aut in futurum concessione pontificum, largitione regum vel principum, oblatione fidelium seu aliis iustis modis, prȩstante domino, poterit adipisci, firma vobis vestrisque successoribus et illibata permaneant. In quibus haec propriis nominibus annotanda subiunximus, videlicet : Butaningum, Castrum vetus, Insulam, Radaldisscum, Casamnenam, Butalianum, Azanellum, Fontanellam, capellam sancti Salvatoris, ecclesiam sancti Petri de Curticella ultra Padum, ecclesiam sanctȩ Mariae de Marzalingo, ecclesiam sancti Michaelis de Marasso, in suburbio civitatis ecclesiam sancti Michaelis cum pertinentiis earum, oratorium quoque sancti Mauritii cum omnibus suis pertinentiis et oblationibus altaris sancti Imerii ....... necnon cȩterum altarium vestrae ecclesiae communitatis vestrȩ usibus in perpetuum semper exhibendas esse censemus. Decernimus igitur, ut nulli omnino hominum liceat, prefatam ecclesiam temere perturbare aut eius possessiones auferre vel ablatas retinere, minuere aut aliquibus vexationibus fatigare, sed omnia integra conserventur, vestris vestrisque successoribus usibus in posterum omnimodis profutura. Ad haec adicientes praecipimus, ut nullus episcopus, comes, vicecomes sive procurator de ipsa vos canonica infestare aut de terris eius fodrum vel aliquam dationem vobis invitis tollere, seu vos vestrosque successores de ipsis terris aliquando sine legali iuditio molestare vel disvestire prȩsumat. Presenti etiam capitulo sancimus, ut infra terminos matricis ecclesiae absque libero vestri capituli consensu nulla de novo ecclesia construatur ; facte vero vel reficiende cuiusvis cimiteriis vel oblationibus, secundum antiquam consuetudinem in usum vestrum perpetuo consistant. Statuimus etiam, ut Cremonensi episcopo non liceat, canonicam vestram indebitis vexationibus aut gravaminibus infestare, sed eam absque molestia in sua permanere libertate. Vos autem, in domino filii carissimi, opportet, mores vestros ab omni malo corrigere et conversationem vestram ad normam constitutionis canonicae custodire, ut, quod nomine censemini, re etiam in divina maiestatis oculis esse possitis.
Si quis igitur in futurum archiepiscopus, episcopus, imperator aut rex, princeps, dux, marchio, comes, vicecomes, iudex aut ecclesiastica quaelibet secularisve persona, hanc nostrae constitutionis paginam sciens, contra eam temere venire temptaverit, secundo tertiove commonita, si non satisfactione congrua emendaverit, potestatis honorisque sui dignitate careat, reamque se divino iudicio existere de perpetrata iniquitate cognoscat et a sacratissimo corpore et sanguine Dei et domini, redemptoris nostri Iesu Christi, aliena fiat, atque in extremo examine districtȩ ultioni subiaceat. Cunctis autem prenominatae ecclesiae atque canonicae sua iura servantibus, sit pax domini nostri Iesu Christi, quatenus et hic fructus bonae actionis percipiant, et apud districtum iudicem praemia eternae pacis inveniant. Amen. Amen. Amen.
[Rota] Ego Innocentius catholicae ecclesiae episcopus ss. [Monogramme]
† Ego Guilielmus Prenestinus episcopus ss.
† Ego Ubertus presbiter cardinalis tit. sancti Clementis ss.
† Ego Lucas presbiter cardinalis tit. sanctorum Iohannis et Pauli ss.
† Ego Romanus diaconus cardinalis sancte Mariae in Porticu ss.
† Ego Gregorius diaconus cardinalis sanctorum Sergii et Bachi ss.
† Ego Wido diaconus cardinalis sanctae Mariȩ in Via lata ss.
† Ego Oddo diaconus cardinalis sancti Georgii ad Velum aureum ss.
† Ego Wido diaconus cardinalis sanctorum Cosme et Damiani ss.
Dat. Brixie, per manum Aimerici, sancte Romanȩ ecclesiae diaconi cardinalis et cancellarii. IIII Kal. septembris, indictione X. Incarnationis dominicae anno MCXXXIII. pontificatus vero domni Innocentii PP II anno III. -
1. Vergl. Repertorio diplomatico Cremonese, p. 36 Nr. 300 und die Urk. vom 30 März 1095 ( APOSCRIPTA n. 4650 ).
Informations
Document
Benjamin
Oury
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 141902 (aposcripta-4802), http://telma.irht.cnrs.fr/chartes/en/aposcripta/notice/141902 (mise à jour : 17/05/2024).