Général
-
Clément VI (1342-1352)
-
Clarissis mon. s. Marcelli de Pogeto concedit facultatem redimendi e manibus laicorum quasdam decimas.1
-
1352, aprilis 22, Avinione.
-
1352
-
Dilectis in Christo filiabus abbatissae et conventui monasterii s. Marcelli de Pogeto prope Castrum novum de Vallibus ord. s. Clarae Caturcen. dioec.
Devotae religionis vestrae sinceritas, qua Domino continue per obsequii gratitudinem acceptas vos redditis et devotas, merito promeretur, ut vestris petitionibus favorabiliter annuentes illa vobis liberaliter concedamus, quae statui necessitatibusque vestris fore conspicimus opportuna. Sane pro parte vestra nobis nuper exhibita petitio continebat, quod nos dudum bonae memoriae Bertrando episcopo Ostiensi, ut ipse ex decimis, quae a laicis in dioecesi Caturcensi a tempore, cuius initii memoria hominum non existeret, possessae fuissent et etiam possiderentur, usque ad valorem annuum trecentarum librarum bonae monetae Turonen. parvorum redimere ac redemptas vobis et monasterio vestro in perpetuum assignare valeret, ac vobis, quod huiusmodi decimas, postquam vobis et eidem monasterio assignatae fuissent, perpetuo habere et licite retinere liceret, auctoritate apostolica per nostras certi tenoris litteras duximus indulgendum. Verum, cum sicut eadem petitio subiungebat, licet dictus episcopus nonnullas decimas, dum viveret, redemerit a quibusdam laicis dictae dioecesis, quas vobis et dicto monasterio vestro assignavit: quia tamen morte praeventus decimas usque ad valorem praefatum a laicis supradictis redimere vobisque et dicto vestro monasterio easdem non potuerit assignare, fuit pro parte vestra nobis humiliter supplicatum, ut providere vobis super hoc de benignitate apostolica dignaremur. Volentes itaque vestris, quantum cum Deo possumus, in hac parte necessitatibus providere, vestris supplicationibus inclinati, quod iuxta dictam concessionem redimere a laicis praefatis huiusmodi decimas usque ad summam restantem de dictis trecentis libris monetae praefatae illasque habere perpetuo et licite retinere possitis, quacumque constitutione contraria non obstante, vobis auctoritate praefata tenore praesentium indulgemus. Nulli ergo etc. Datum Avinione X kalendas maii anno decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°613., p.266
-
Reg. Vat. t. 209 (Clem. VI a. 10, l. 3, p. 2), ep. 688; Wadd. l. c. reg. pont. Clem. VI, p. 2, n. 114. Cfr. supra n. 457. Die 8 dec. 1351 S. P. eidem monasterio episcopos Vauren., Ruthenen., Mirapiscen. constituit conservatores iurium et bonorum ipsius (l. c. t. 208, f. 191, ep. 38).
1