Général
-
Clément VI (1342-1352)
-
Robertum de s. Severino militem ab excommunicationis sententia, quam incurrit, eo quod monasterium Clariss. de Gentiano (Genzano) destruxit, absolvi iubet, dummodo ipsum mon. in alio loco reaedificet.1
-
1352, februarii 11, Avinione.
-
1352
-
Venerabilibus fratribus Bitontin. et Lubren. episcopis ac dilecto filio abbati monasterii s. Mariae de Baucia Acheruntin. dioecesis.
Petitio pro parte nobilis viri Roberti de sancto Severino militis, comitatus Coriliani domini, nuper nobis exhibita continebat, quod dudum ipse, dum regnum Siciliae agitaretur guerrarum turbinibus, monasterium sanctae Mariae Annuntiatae ordinis sanctae Clarae, quod praedecessores ipsius Roberti iuxta castrum Gentiani Acheruntin. dioecesis aedificaverant, et ecclesiam dicti monasterii, ne hostes publici regni Siciliae, in quo idem castrum situm est, et ipsius Roberti contra eum se fortificarent ibidem, quod ad desolationem ipsius castri et vicinarum partium redundasset, ac etiam ex certis aliis causis rationabilibus dirui et destrui fecit: propter quod excommunicationis sententiam in tales a canone generaliter promulgatam noscitur incurrisse. Quare pro parte ipsius Roberti fuit nobis humiliter supplicatum, ut, cum ipse paratus existat, praedictum monasterium in eodem castro, in loco ad hoc decenti et honesto, suis expensis et sumptibus facere reaedificari, providere super hoc de opportunae absolutionis beneficio sibique reaedificandi huiusmodi monasterium licentiam concedere dignaremur. Nos igitur, cum eodem Roberto publicae utilitatis intuitu volentes agere favorabiliter in hac parte, ipsius supplicationibus inclinati, discretioni vestrae per apostolica scripta mandamus, quatenus ille vestrum, qui super hoc fuerit requisitus, eumdem Robertum, prius tamen de ipso reaedificando monasterio idonea et sufficienti cautione recepta, a praedicta excommunicationis sententia absolvat hac vice in forma ecclesiae consueta, iniungens ei poenitentiam salutarem, quam secundum Deum animae suae saluti viderit expedire; et nihilominus eidem Roberto, postquam absolutus fuerit, ut praefertur, praedictum monasterium in eodem castro reaedificandi cum oratorio, campanili, campana et aliis necessariis officinis ac, postquam reaedificatum fuerit, monialibus prioris monasterii ad idem novum monasterium se transferendi et habendi coemeterium in eodem licentiam auctoritate apostolica tribuat (fel. rec. Bonifatii papae VIII praedecessoris nostri et aliis constitutionibus apostolicis contrariis non obstantibus quibuscumque): proviso, quod solum, ubi dicta ecclesia ipsius prioris monasterii fuit, et coemeterium eiusdem prioris monasterii tamquam hereditas ad manus non perveniat laicorum. Datum Avinione III idus februarii anno decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°606., p.264
-
Reg. Vat. t. 209 (Clem. VI a. 10, l. 3, p. 2), ep. 377; Wadd. l. c. reg. pont. Clem. VI, p. 2, n. 111. Cfr. supra n. 333 et huius op. t. V, n. 658.
1