« bullarium-franciscanum-4990 »

Venerabilibus fratribus archiepiscopo Pragen. et Cracovien. ac Olomucen. episcopis.

Nuper pro parte dilectorum filiorum ministri et fratrum ordinis Minorum provinciae Boemiae secundum morem dicti ordinis nobis extitit intimatum, quod olim proposito pro parte ipsorum coram dilecto filio nostro Guidone Tusculan. episcopo, tunc tituli sanctae Caeciliae presbytero cardinali, in illis partibus apostolicae sedis legato, quod nonnulli plebani ac rectores ecclesiarum eorumque locum tenentes dictae provinciae quandoque palam praedicabant ac etiam ad partem in privatis colloquiis suggerebant: quod dicti fratres quantumcumque essent per superiores suos electi et ordinariis locorum praesentati, legitime non poterant nec debebant parochianorum dictarum ecclesiarum confessiones audire nec etiam eisdem iniungere poenitentias salutares: praemissis adiicendo, quod, si dicti parochiani eisdem fratribus confessi essent, tenebantur nihilominus eadem peccata dictis rectoribus seu eorum loca tenentibus iterum confiteri; nonnulli etiam ex eisdem plebanis, rectoribus ac loca tenentibus parochianos praefatos, nisi eis confiterentur infra annum, quantumcumque dictis fratribus confessi et per eos absoluti existerent iuxta formam ecclesiae consuetam, excommunicabant ac eis etiam infirmis denegabant eucharistiae sacramentum: idem Guido tunc legatus praefatus super his diligentius informatus, attendens praemissa fore contra constitutionem dudum per fel. rec. Ioannem papam XXII praedecessorem nostrum super hoc editam, illa fieri prohibuit per suas litteras speciales.

Nos igitur cupientes, cunctos orthodoxae fidei professores et viros praesertim ecclesiasticos sic ad invicem et quoad alios etiam conversari, quod ex eorum verbis seu gestis nullius offendatur iustitia nullumque animarum detrimentum proveniat nec etiam cuiquam scandali materia praeparetur, ac volentes, ut, quod circa observationem constitutionis eiusdem per dictum Guidonem olim legatum praefatum provide factum est, diligentius observetur, ipsorumque ministri et fratrum supplicationibus inclinati, fraternitati vestrae per apostolica scripta mandamus, quatenus ... eamdem constitutionem, cuius tenorem fecimus de verbo ad verbum praesentibus inseri, faciatis auctoritate nostra in dicta provincia inviolabiliter observari, contradictores per censuram ecclesiasticam compescendo, non obstante etc. Tenor autem dictae constitutionis talis est: « Ioannes episcopus, servus servorum Dei, venerabilibus fratribus patriarchis, archiepiscopis et episcopis ac dilectis filiis electis, ad quos praesentes litterae pervenerint, salutem atque apostolicam benedictionem. Vas electionis » etc. ut huius op. t. V, n. 437. Nulli ergo etc. Datum Avinione II kalendas augusti anno decimo.