« bullarium-franciscanum-4986 »

Venerabili fratri Raymundo episcopo Avellinen.

Ad universalis ecclesiae regimen exercendum etc. Dudum siquidem Nicolao episcopo Avellinen. ecclesiae Avellinen. regimini praesidente nos ... provisionem eiusdem ecclesiae, cum vacaret, dispositioni nostrae ea vice duximus specialiter reservandam etc. Postmodum dicta ecclesia per obitum ipsius Nicolai, qui nuper extra Romanam curiam diem clausit extremum, pastoris solatio destituta, nos vacatione huiusmodi fide dignis relatibus intellecta ... post deliberationem, quam de praeficiendo eidem ecclesiae personam utilem ac etiam fructuosam cum nostris fratribus habuimus diligentem, demum ad te ordinis fratrum Minorum professorem, in sacerdotio constitutum, litterarum scientia praeditum, religionis zelo conspicuum, vitae ac morum honestate decorum, in spiritualibus providum et in temporalibus circumspectum aliisque multiplicium virtutum meritis insignitum, direximus oculos nostrae mentis. Quibus omnibus attenta meditatione pensatis, de persona tua ipsi Avellinen. ecclesiae de praedictorum fratrum consilio auctoritate apostolica duximus providendum teque illi praefecimus in episcopum et pastorem, curam et administrationem ipsius ecclesiae tibi tam in spiritualibus, et temporalibus plenarie committendo: tibique per venerabilem fratrem nostrum Petrum episcopum Praenestin. apud sedem apostolicam fecimus munus consecrationis impendi etc. Datum Avinione V kalendas iulii anno decimo.

In eumdem modum archiepiscopo Beneventano, capitulo ecclesiae Avellinen., clero ac populo civ. et dioec. Avellinen.