« bullarium-franciscanum-4783 »

Venerabili fratri Antonioa episcopo Gaietan. et dilecto filio Ioanni electo Coronen., apostolicae sedis legatis.

Universalis ecclesiae licet insufficientibus meritis, disponente Domino, regimini praesidentes curis sollicitamur assiduis et continuis sollicitudinibus agitamur, ut plebs fidelium custodiae nostrae commissa fidei claritate resplendeat et errorum quorumlibet fugata caligine, in lumine veritatis incedens, serpentis callidi non vereatur insidias et astutias satanae divina gratia se protegente confutet. Dudum siquidem venerabiles fratres nostri consolator dictus catholicon Armenorum nec non archiepiscopi et episcopi ac dilecti filii abbates et ceteri clerici in Armenia constituti per nunciosb et litteras eorum nobis intimare curarunt, quod olim fel. rec. Benedictus papa XII praedecessor noster, dum adhuc ageret in humanis, eos per litteras apostolicas requisivit et monuit, ut errores aliquos fidei catholicae repugnantes, quos periculose nimium in partibus illis perceperat pullulasse quorumque praedecessor idem eis seriem descripserat, distincte succiderent et congregata synodo condemnarent, illos de cordibus Armenorum et aliorum, quos tamquam simpliciores malignus hostis facilius laqueo damnationis involverat, extirpando: quodque ipsi praedicti litteris praedecessoris eiusdem filiali devotione susceptis ac per eos synodo congregata huiusmodi errores abiecerant et prout decuit condemnarant, ulterius offerentes, quod, si in libris eorum, quibus communiter utuntur, aliqua fortassis reperirentur erronea et fidei repugnantia, supradicti parati erant, illa de libris eisdem iuxta mandatum eiusdem ecclesiae delere penitus seque institutis apostolicis penitus conformare. Verum, quia, sicut habet displicens relatio facta nobis, antiquus hostis errores alios damnabiles et omnino damnatos in partibus Armeniae inseruit, qui, nisi catholicae doctrinae falce fuerint resecati, in perniciosam segetem coalescerent, nos huiusmodi et alios errores de partibus illis extirpari funditus et evelli radicitus ac fidem inseri et excoli cupientes et attendentes, quod divina providentia, quae dat omnibus affluenter et non improperat, sic vobis thesauros magnae ac profundae scientiae credidit, sic vos multis virtutibus insignivit, ut sciatis et possitis ei circa beneplacita sua devotum, acceptum et diligentem impendere famulatum, vobis et vestrum cuilibet tamquam Dei ministris et viris in lege Domini plenius eruditis ac ipsius fidei sinceris et fervidis zelatoribus, qui per ipsius semitam mandatorum Domini gradientes studetis ipsum verum lumen de lumine veramque sapientiam, quantum vobis ab ipso permittitur, imitari, in dictis partibus Armeniae plenae legationis officium duximus committendum, ut ibidem auctore Domino recta regentes et dirigentes etiam indirecta ac aspera convertentes in plana, sicut cultores diligentes atque solliciti, evellatis et destruatis, dissipetis et plantetis ac disperdatis et aedificetis, sicut vobis Dominus ministrabit. Ideoque discretionem vestram monemus, requirimus et hortamur per apostolica scripta mandantes, quatenus, de divina gratia et apostolico favore confisi onus tam salubris negotii suscipientes devota mente ac animo reverenti et ad partes illas vos conferentes personaliter, ad praedictos et alios errores quoslibet ac vitia de illis supputanda partibus nec non fidem catholicam ac mores et virtutes etiam propagandos operarias manus diligenter ac sollicite apponere studeatis: ipsos praelatos, clerum et populum de ipsius fidei veris dogmatibus salutarique doctrina informantes ac plenius et perfectius instruentes, ita quod praestante Domino de partibus illis omnis per operationis vestrae fructuosum studium errorum ac vitiorum spurcitia expietur et eadem fides catholica ad laudem et gloriam Redemptoris radicetur firmius, dilatetur diffusius et fortius roboretur, vosque praeter retributionis aeternae praemium, quod indubitanter assequemini, exinde nostram et dictae sedis benedictionem et gratiam vobis uberius vindicetis. Datum Avinione II kalendas septembrisc anno quinto.d