« bullarium-franciscanum-4710 »

Dilecto filio Eustachio de Ancona electo Neopacten.

Summi dispositione rectoris etc. Nuper siquidem ecclesia Neopacten. per obitum bonae memoriae Ioannisa archiepiscopi Neopacten., qui extra Romanam curiam diem clausit extremum, pastoris solatio destituta, dilecti filii capitulum eiusdem ecclesiae (vocatis omnibus, qui debuerunt, voluerunt et potuerunt commode interesse, die ad eligendum praefixa, ut moris est) convenientes in unum et Spiritus sancti gratia invocata te tunc guardianum ordinis fratrum Minorum de Clarentiab Olenen. dioecesis, in sacerdotio constitutum, in Neopacten. archiepiscopum quasi per inspirationem divinam concorditer elegerunt, tuque superioris tui petita et obtenta licentia electioni huiusmodi de te factae, illius tibi praesentato decreto, ad instantiam capituli praedictorum consentiens ad sedem apostolicam personaliter accessisti ac huiusmodi electionis negotium proponi fecisti in consistorio coram nobis, in his omnibus statutis a iure temporibus observatis. Cumque postmodum omni iuri tibi competenti ex electione praefata libere in nostris manibus sponte cessisses, nos huiusmodi cessione admissa ... post deliberationem, quam super his cum fratribus nostris habuimus diligentem, demum ad te, cui de litterarum scientia, morum et vitae conversatione laudabili, maturitate consilii, prudentia spiritualium et temporalium providentia ac multiplicibus aliis virtutum meritis apud nos fidedigna testimonia perhibentur, convertimus oculos nostrae mentis. Quibus omnibus ac etiam concordi eorumdem capituli te eligentium voluntate debita meditatione pensatis, de persona tua eidem Neopacten. ecclesiae de dictorum fratrum nostrorum consilio et apostolicae potestatis plenitudine providemus teque illi praeficimus in archiepiscopum et pastorem, curam et administrationem illius tibi in spiritualibus et temporalibus plenarie committendo etc. Datum apud Villam novam Avinionen. dioecesis VI kalendas iulii anno quarto.

In eundem modum universis suffraganeis ac capitulo et vassallis ecclesiae Neopacten., clero ac populo civitatis et dioecesis Neopacten., Roberto principi Tarentino.