« bullarium-franciscanum-4501 »

Dilectis filiis ‥ praeposito mon. Bellimontis per praepositum soliti gubernari et ‥ priori s. Leontii Vabren. et Ruthenen. dioc.

Dudum per dilectum filium Aymonem de Calvomonte ord. Praed., inquisitorem haereticae pravitatis in regno Franciae, nostro apostolatui intimato, quod dilectus filius Petrus Calveti ordinis Minorum in loco fratrum dicti ordinis de Amiliano Ruthenensis dioecesis nonnulla contra fidem catholicam asseruerat et publice coram populo praedicarat, et quod ipse inquisitor quandam informationem tunc nobis per eum sub suo sigillo transmissam fecerat et receperat: Nos volentes super hiis veritatem diligentius indagare, dilecto filio nostro Guillelmo tit. ss. Quatuor Coronatorum presbytero cardinali commisimus et mandavimus oraculo vivae vocis, ut super contentis in informatione praedicta ex officio inquireret, et quae super hiis inveniret, nobis fideliter referre curaret. Coram quo cardinale praefato Petro in iudicio comparente ac per eum super quibusdam capitulis, sibi per dictum cardinalem super praemissis exhibitis, factis nonnullis responsionibus et contra dictam informationem ipsius inquisitoris quibusdam exceptionibus datis nec non per Petrum praefatum ad defensionem suam certis articulis formatis et traditis coram cardinale praedicto in terminis ad singulos actus huiusmodi supradicto Petro successive et peremptorie per cardinalem eundem assignatis; quia per ea, quae coram praefato cardinale apud dictam sedem in negotio praedicto sunt habita, non potest apud sedem eandem de ipsius negotii meritis plene liquere, discretioni vestrae per apostolica scripta mandamus, quatenus vos vel alter vestrum testes, litteras et instrumenta, quae praefatus Petrus Calveti super dictis suis articulis, quos idem cardinalis vobis sub suo sigillo transmittit inclusos, coram vobis duxerit producenda, infra trium mensium spatium post receptionem praesentium prudenter recipere ac testes ipsos iuxta datam a Deo vobis prudentiam diligenter examinare curetis, litteras et instrumenta praedicta transcribi fideliter faciendo, depositiones omnium testium praedictorum fideliter in scriptis redactas una cum articulis supradictis ac transumptis litterarum et instrumentorum praedictorum sub vestris sigillis inclusas ad nostram praesentiam quantocius transmissuri ac significaturi nobis, quae et quanta sit fides eisdem instrumentis et litteris adhibenda; praefixo eidem Petro Calveti termino peremptorio competenti, quo cum omnibus actis, iuribus et munimentis suis huiusmodi causam tangentibus apostolico se conspectui repraesentet, iustam dante Domino sententiam recepturus. Testes autem, qui fuerint nominati, si se gratia, odio vel timore subtraxerint, per censuram ecclesiasticam appellatione cessante cogatis veritati testimonium perhibere; diem vero praefixionis huiusmodi et formam, et quicquid super praemissis duxeritis faciendum, nobis per vestras litteras harum seriem continentes fideliter intimetis. Dat. Avinione VI kal. augusti anno quinto.