« bullarium-franciscanum-4401 »

Carissimo in Christo filio Ioanni regi Boemiae illustri.

Potentiae saecularis et praesertim catholicorum regum et principum, cuiuscumque sint praeeminentiae, dignitatis aut status, materialis gladius in fulcimentum ecclesiasticae potestatis institutus existit tam divinitus quam humanitus, provisione videlicet canonica et civili, ut, qui iudicium vel censuram ecclesiasticam damnabiliter vilipendunt, per brachii temporalis auxilium potentialiter compellantur. Est ergo exerendus promptius ipse gladius et vigorosius exercendus contra quoslibet hostes crucis Dominicae ac non minus sed potius contra haereticos, credentes, fautores, defensores et receptatores eorum, qui maiestatem aeternam periculosius offendere non expavent. Nos itaque cupientes fervide ac opem et operam sollicite impendentes, ut tales pestiferi homines, qui ad gremium sanctae matris ecclesiae redire noluerint, proscribantur ubique de agro Domini et etiam desolationis ultimatae opprobrio confundantur auctoritate sonora, tam per nos quam per alios viros prudentes et orthodoxae fidei zelatores vigilis speculatoris ministerium iugiter exercemus, ut contra huiusmodi execrabiles homines per orbis climata, in quibus Christiani nominis cultus viget, non desit indago diligens nec desistat. Huiusmodi namque provisionis cautelam in regno tuo, Christianitatis titulo insignito, adhibere volentes, ne latens in eo pestis haeretica cum vulpinae sagacitatis astutia serpere valeat et contagium errorum iacere in simplices animas fidelium aliorum, ac de dilecti filii Petri de Naczeracz ordinis fratrum Minorum prudentiae industria et de ipsius fervore devotionis et fidei, de quibus nobis a fide dignis (etiam dicti ordinis) laudabile testimonium perhibetur, plenam in Domino fiduciam obtinentes, eum elegimus ad huiusmodi sollicitudinis curam laborisque sarcinam tam necessarias quam salubres ad honorem Dei et exaltationem fidei praelibatae specialiter supportandas et debite ac prout tanti negotii arduitas exigit exequendas sollicite ac prudenter, dictumque Petrum inquisitorem haereseos in civitate et dioecesi Olomucen. per nostras litteras duximus deputandum, qui iuxta instituta canonica super his promulgata, clero et populo auctoritate apostolica convocatis, generalem praedicationem in dictis civitate ac dioecesi, ubi et quotiens expedire viderit, faciens, inquisitionis officium contra labem haereticae pravitatis ferventer et fideliter, prout ei Deus dederit, exequatur contra haereticos, credentes, fautores, defensores et receptatores eorum secundum instituta huiusmodi auctoritate praefata nihilominus processurus; et si aliqui, haeretica perfidia penitus abiurata, redire voluerint ad ecclesiae unitatem, ipsis iuxta formam ecclesiae ac secundum instituta huiusmodi beneficium absolutionis impendat ac iniungat eis, quae secundum dicta instituta sunt talibus iniungenda. Ideoque magnificentiam regiam rogamus, monemus et hortamur attente in remissionem tibi peccaminum iniungentes, quatenus eumdem inquisitorem pro divina et apostolicae sedis ac nostra reverentia benigne recipias et honeste pertractes, eidem in iis regalis favoris praesidium et opportunum auxilium taliter impendendo, quod ipse inquisitionis huiusmodi officium sibi commissum exequi valeat inconcusse, nosque sinceritatis tuae zelum possimus in Domino amplis laudibus commendare, ac tu exinde perenne bonum, quod suis fidelibus divina clementia pollicetur, ad regis regum coelestis laudem et gloriam, animae tuae salutem ac regni eiusdem exaltationem digne consequi merearis. Datum apud Pontemsorgiae Avinion. dioecesis XI kal. septembris anno primo.a