Général
-
Benoît XII (1334-1342)
-
Decernit, ne quis fratrum ordinum Mendicantium ad ordines s. Benedicti et Cistercien. absque speciali licentia sedis apost. se transferat.1
-
1335, iulii 4, Avinione.
-
1335
-
Ad perpetuam rei memoriam.
Regularem vitam professis sic expedit subtrahi omnem inquietitudinis et turbationis materiam, quod in contemplationis suavitate quiescere valeant et tranquillum Domino reddere famulatum. Cum igitur ex eo, quod professores ordinum Mendicantium ad Monachorum nigrorum et Cisterciensium ordines consueverunt plerumque transire, multas in dictis ordinibus turbationes, infestationes, molestias, damna et scandala provenisse experientia doceat manifeste, Nos iis ex debito pastoralis officii pro futuro tempore occurrere cupientes de consilio fratrum nostrorum decernimus, ne quis cuiusvis ordinis Mendicantium professor ad aliquem dictorum ordinum quoquomodo transire valeat sine Romani pontificis licentia speciali, plenam et expressam faciente de constitutione huiusmodi mentionem: non obstantibus privilegiis apostolicis quibuscumque concessis in contrarium dictis ordinibus Mendicantium seu ipsorum praelatis aut aliquibus eorumdem, quae quoad hoc ex nunc fore nullius decernimus firmitatis. Nulli ergo etc. Datum Avinione, IV nonas iulii, anno primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°10., pp.9-10
-
Reg. Vat. t. 119 (Ben. XII, a. 1) de curia ep. 30; typis impr. in Bull. Rom. (ed. Taur.) IV, 328, et in Bull. Domin. II, 219. — Die 17 iunii 1335 Ben. XII constitutionem de religiosis apostatis ediderat incip. « Pastor bonus », qua inter alia haec ordinat: « Circa illos ex dictis apostatis, qui ordinum Mendicantium fuerint, etiam volumus et ordinamus, quod, si apostatae ipsi ordinum ut praedicitur Mendicantium in suis primis locis eorundem suorum ordinum recipi commode nequeant, in aliis locis cuiusque ipsorum vel alterius ordinis dictorum Mendicantium, si alii Mendicantes huiusmodi apostatas recipere voluerint, hac vice collocentur; et nihilominus religiosi praedicti locorum eiusdem ordinis ad recipiendum apostatas ipsos, qui transire ad alia loca eiusdem ordinis ut praefertur habebunt, ad recipiendum dictos apostatas in locis huiusmodi per exequutores a praedicta sede (apostolica) super hoc deputandos, si opus fuerit, censura simili compellantur ». Reg. Vat. t. 120, ep. 4 de curia.
1