« bullarium-franciscanum-4106 »

[Eduardo] regi Angliae.

Indubitatam de serenitate regia fiduciam obtinemus, quod zelo fervens fidei ortodoxae, clarae memoriae progenitorum tuorum catholicorum principum imitando vestigia, operosis intendis sollicitudinibus ad extirpandos errores et haereses de finibus regni tui. Sane nuper ad audientiam dilecti filii magistri Itherii de Concoreto canonici Saresberiensis, apostolicae sedis nuncii, fidedigna relatione perducto, quod Petrus de Saxlingheem et Iohannes de Hoquintone ordinis fratrum Minorum in illam proruperant insaniam, quod dampnatos per constitutiones et declarationes apostolicae sedisa pessimos errores et haereses in eodem regno, ubi catholicae fidei viget cultus, praedicare ac dogmatizare publice in divinae maiestatis offensam ac fidei et fidelium praesertim dicti regni contumeliam et periculum suarumque animarum salutis dispendium praesumpserant et etiam praesumebant, idem nuncius, sicut vigore litterarum nostrarum sibi directarum poterat, memoratos Petrum et Iohannem, informatione per ipsum de praedictis recepta, primitus arrestavit et cepit, eosque sub eodem arresto in domo fratrum eiusdem ordinis Cantabrigensiumb Eliensis diocesis sub certis modis et poenis custodiendos fideliter assignavit. Cum autem nos volentes scire de praemissis plenius veritatem, ipsos citari et evocari ac ad praesentiam nostram adduci mandamus, regalem excellentiam rogamus et hortamur attentius, quatinus, quantum tibi, fili carissime, tuaeque saluti et honori ac utilitatibus dicti regni expediat, ut errores et haereses extirpentur exinde, ne pullulare valeant, in examine regiae considerationis adducens tam praefato nuncio quam aliis, per quos praefatos Petrum et Iohannem nobis mandamus transmitti, sic prompte pro divina et apostolicae sedis reverentia velit benigne circa missionem eorum favoribus opportunis assistere regia celsitudo, quod praeter mercedis perennis praemium dignis in Domino laudibus propter hoc merito debeat commendari. Datum Avinione, IX kalendas septembris, anno tertiodecimo.