Général
-
Jean XXII (1316-1334)
-
Processus habitos contra Michaelem de Caesena, Bonagratiam de Pergamo, Guilelmum Occam, de haeresi vehementer suspectos, publicari iubet.1
-
1328, iunii 20, Avinione.
-
1328
-
[Aycardo] Archiepiscopo Mediolanen. eiusque suffraganeis.
Pridem contra Michaelem de Caesena, olim fratrum ordinis Minorum generalem ministrum, et Bonagratiam ac Guilelmum Okam Anglicum, eiusdem ordinis fratres, de Romana curia fugitivos, excommunicatos ac de haeresis et scismatis criminibus vehementer suspectos, exigente iustitia processimus in hunc modum: « Ioannes etc. Ad futuram rei memoriam. Dudum ad nostri apostolatus auditum » etc. ut supra n. 714. Volentes itaque processum praedictum et contenta in eo, ne fratres dicti Minorum ordinis fideles et alii per astutias ac fraudes et calliditates dictorum Michaelis et eius complicum circumveniri valeant, in eis partibus publicari, fraternitati vestrae per apostolica scripta mandamus, quatenus per vos vel alium seu alios in ecclesiis et locis vestrarum civitatis et diocesis, de quibus vobis videbitur, ac in sermonibus fratrum praedicti ordinis et aliorum religiosorum publicis praedictum processum et contenta in eo solemniter singulis diebus dominicis ac festivis publicetis, exponendo ea nihilominus, ut clarius intelligantur ab omnibus, in vulgari; ministros, custodes, guardianos et alios fratres dicti Minorum ordinis (sub excommunicationis in personas et interdicti in ecclesias, conventus et loca ipsorum nec non depositionis ab officiis et inhabilitatis ad quoscunque honores, dignitates, gradus et status ecclesiasticos poenis et sententiis, quas non obstantibus quibuscunque privilegiis apostolicis sibi et ordini suo sub quacunque forma vel expressione verborum concessis, quae quoad haec nulli volumus suffragari, eos, qui contra monitionem, requisitionem, inhibitionem huiusmodi aliter attemptare praesumpserint, incurrere volumus ipso facto) moneatis efficaciter et requiratis, eisdem nihilominus districtius inhibendo, ne eumdem Michaelem excommunicatum et depositum ab officio ministeriatus generalis ordinis praedicti et inhabilem ad quoscunque honores, dignitates et status ecclesiasticos ut praefertur habeant, reputent seu teneant pro ministro nec ei pareant vel obediant aut praestent per se vel alium publice vel occulte auxilium, consilium vel favorem, sed potius venerabili fratri nostro Bertrando episcopo Tusculano, quem administratorem generalem eiusdem ordinis, quousque aliter fuerit eidem ordini de generali ministro provisum, dudum de fratrum nostrorum consilio auctoritate apostolica constituimus, in omnibus, quae ad officium generalis ministri praelibati ordinis pertinent, pareant et intendant, ac tandem eundem Michaelem quam dictos complices velut excommunicatos ac de haeresis et scismatis suspectos criminibus studeant evitare: ad hoc idem fideles, clerum et populum, sollicitis exhortationibus inducendo faciendoque super hiis instrumenta confici publica principium et finem praesentium continentia, quae nobis transmittere fideliter non tardetis. Dat. Avinione, XII kal. iulii, anno duodecimo.
In e. m. fuit scriptum legatis Tusciae et Lombardiae ac officialibus terrarum ecclesiae [Romanae] necnon diversis praelatis... diversis temporibus mutatis verbis decenter, sicut extitit opportunum (cf. n. 717).
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°718., pp.351-352
-
Reg. Vat. t. 114, p. II, f. 124 et 125, epp. 1336 et 1337. — Inter miscellanea arch. Vat. (sign. C, fasc. 2) complura habentur documenta, quorum auctores scripto testantur, illos processus solemniter esse proclamatos. Inter haec testimonia significamus illas proclamationes, quae (si primam quae sequitur excipias) in ipsorum fratrum Minorum ecclesiis aut conventibus sunt factae. Publicati siquidem sunt isti processus mensibus augusti vel septembris a. 1328 in his locis: 1) in ecclesia maiori Assisiensi ex mandato Theobaldi ep. Assisien. per Guidonem priorem ipsius ecclesiae; 2) in ecclesia s. Francisci de Assisio ex mandato fratris Francisci Ioli Ugucini per fr. Ioannem magistri Ioannis praesentibus fratribus Castellano de Bononia et Simone Lolli de Assisio; 3) in ecclesia s. Mariae Angelorum Assis. ex mandato fr. Ioannis Ugucii guardiani ipsius loci per fr. Stephanum mag. Simonis de Assisio; 4) in ecclesia s. Clarae Assis. ex mandato fr. Philippi custodis conventus s. Francisci Assis. per Munaldum guard. ipsius conventus s. Clarae praesentibus fratribus Ioanne Thomassini, Andrea Pucii, Massolo Bertae de Assisio, Raynaldo de Castello, Bono de Florentia; 5) in ecclesia s. Crispoliti de Bitonio dioec. Assis. ex mandato Ioannis de Bitonio guard. dicti loci; 6) in ecclesia s. Andreae de Spello ex mandato Petri Nutoli guardiani loci fratrum Min. de Spello per fr. Franciscum Raynaldi; 7) in ecclesia fr. Min. Fulginaten. per fr. Angelum de Cannaria; 8) in ecclesia fr. Min. Spoletan. per fr. Petrum Stephanucii praesentibus fratribus Stephano de Apulia, Petro domini Pauli, Neapoleone domini Ursi; 9) in loco capricornii fr. Min. Eugubin. per fr. Franciscum Bonaepatriae custodem Eugubinum praesentibus fratribus Donatucio de Cisterna, Sabatello Ricci, Baldello Mathiae, Ciuffulo Aighinae; 10) in loco Gualdi dioec. Nucerin. per eumdem fr. Franciscum Bonaepatriae praesentibus fratribus Lemosina magistri Leonardi vicario, Petro Bartolucii, Galgano Avolcroni, Ciccolo Mathiae, Angelucio Acti; 11) in ecclesia loci de Fracta filiorum Uberti dioec. Eugubin. per fr. Bartolum de Lodoris de Castello de mandato fr. Conradi guardiani ipsius loci de Fracta et postmodum ibidem per fr. Andream de Civitate Castelli guardianum loci siti iuxta castrum filiorum Uberti; 12) in loco de Montone per fr. Ioannem Munaldi de Castello de mandato fr. Petri Bruzzoli guardiani ipsius loci; 13) in loco de Amelia per fr. Latinum Magistri guardianum ipsius loci praesentibus fratribus Angelo Farmarii bacallario in theol., Ioanne magistri Petri de Amelia, Alexandro de Tuderto, Angelo de Bassculis; 14) in ecclesia s. Illuminati prope castrum Alviani per fr. Alexandrum de Tuderto coram fratribus Francisco guardiano, Bartholomaeo de Monticulis, Petro dicto Abbas, Philipello laico de Tuderto, Iacopo laico de Farneta; 15) in refectorio loci Canalis per fr. Iacobum custodem Tudertinum praesentibus fratribus ipsius loci Ioanne Bonavolglae, Andrea de Collevaleza, Angelo Mannis, Blasio de Tuderto; 16) in ecclesia fr. Min. de Stronconio per fr. Angelum custodem Narniensem praesentibus fratribus Gentili guardiano, Benedicto de Amelia, Nonucio de Spoleto, Petro de Pedeluco; 17) in capitulo conventus fr. Min. Interamnen. per eundem custodem praesentibus fratribus Nicolao Lucae guardiano, Nicolao Camerae lectore, Sapito, Odone, Angelo Ioannis, Franciscucio Nicolai de Interamna, Bartholomaeo de Regno; 18) in capitulo conventus fr. Min. Narnien. per eundem custodem praesentibus fratribus Aegidio vicario, Ioanne de Carbio bacallario, Paulo et Mathia de Narnia, Ioanne de s. Gemino; 19) in ecclesia fr. Min. de Nursia per supradictum fr. Franciscum Bonaepatriae cust. Eugub. praesentibus fratribus magistro Petro Ioannis, Mathiolo Masseoli, Lolo Bartholucii de Nursia; 20) in ecclesia s. Mariae de Rumita de terris Arnulforum per fr. Geminellum de s. Gemino de mandato fr. Iacobi custodis Tudertini praesentibus fratribus Francisco de Collaçono, Simone de Podio, Tebalducio de Aquasparta; 21) in loco s. Francisci de Visso per fr. Venantium de Visso de mandato fr. Ioannis custodis Montanorum praesentibus fratribus Saviolo Francisci, Puccio Servito, Cambio Sponis, Angeleno Riccumani, Monichello Benvenuti et postmodum ibidem per fr. Franciscum guardianum ipsius loci de Visso; 22) in loco s. Francisci de Arquata per fr. Ioannucium Sapiti de Monteflorum praesentibus fratribus Ioanne Raymundi Petri et Ioannucio Andreae; 23) in loco de Valle per fr. Iacobum guardianum ipsius loci; 24) in loco de Cassia per fr. Antonium de Arquata guardianum ipsius loci; 25) in loco de Burgo Cerreti per fr. Paulum de Cassia conventualem ipsius loci de mandato fr. Ioannis custodis Montanorum praesente fr. Luca de Mevali guardiano eiusdem loci; 26) in ecclesia s. Francisci de Monteregali par fr. Ioannem de Monteleone praesentibus fratribus Gualterio de Monteregali aliisque; 27) in loco de Ocosio per fr. Ioannem de Cassia guardianum ipsius loci; 28) in loco de Gonessa per guardianum ipsius loci praesentibus fratribus Francisco lectore aliisque; 29) in ecclesia s. Mariae de Piperno per fratrem Raynaldum de Setia lectorem conventus s. Laurentii de Piperno praesente Georgio vicario gen. episcopi Terracin. — Hic Pipernensis conventus pertinebat ad provinciam Romanam, ceteri ad prov. s. Francisci.
1