« bullarium-franciscanum-3799 »

Venerabili fratri [Gundisalvo] episcopo Aurien.

Sacra religio dilectorum filiorum guardiani et conventus ordinis fratrum Minorum de Monte Regisa tuae dioecesis referta virtutum fecunditate meretur, ut eos illa gratia favorabiliter prosequamur, quae suis fore asseritur necessitatibus opportuna. Petitio siquidem dilecti filii nobilis viri Philippi, nati clarae mem. Sanctii regis Castellaeb, nobis exhibita continebat, quod locus de Monte Regis, in quo ipsi guardianus et conventus degunt, adeo distemperatus existit, quod propterea ipsos frequenter infirmari et mori contingit; quare idem nobilis nobis humiliter supplicavit, ut providere ipsis super hoc de opportuno remedio dignaremur. Praemissorum itaque consideratione inducti et dicti nobilis supplicationibus inclinati, fraternitati tuae, de qua et in his et aliis plenam in Domino fiduciam obtinemus, per apostolica scripta mandamus et committimus, quatenus, si est ita, eisdem guardiano et conventui dimittendi praedictum locum seque transferendi in Vianamc Astoricen.d dioec., locum quidem dicti nobilis, ibique construendi ecclesiam et necessarias officinas, non obstante constitutione fel. record. Bonifatii papae VIII, auctoritate nostra licentiam largiaris sine iuris praeiudicio alieni. Datum Avinione, nonis augusti, anno septimo.