Général
-
Jean XXII (1316-1334)
-
Ioanni de Beccaria ord. Min. committit administrationem ecclesiae Papien. (Pavia).1
-
1320, novembris 16, Avinione.
-
1320
-
Dilecto filio fratri Ioanni de Beccaria ordinis fratrum Minorum, administratori ecclesiae Papien. in spiritualibus et temporalibus auctoritate apostolica deputato.
Dudum in Isnardum quondam patriarcham Antiochenum, tunc administratorem ecclesiae Papien., exigentibus suis multiplicibus demeritis atque culpis perpetuae depositionis sententiam duximus promulgandam, omni honore et patriarchali dignitate ac administratione dictae ecclesiae Papien. privantes eumdem.a Porro dilectus filius noster Bertrandus tituli sancti Marcelli presbyter cardinalis, apostolicae sedis legatus, ne praefata Papien. ecclesia providi gubernatoris destituta regimine in spiritualibus et temporalibus subiret gravia detrimenta, curam et administrationem ac gubernationem eiusdem ecclesiae in spiritualibus et temporalibus tibi auctoritate apostolica, eidem Bertrando specialiter in hac parte concessa duxit per suas litteras committendam, gerendam a te et libere in omnibus exercendam. Quocirca discretioni tuae per apostolica scripta mandamus, quatenus curam et administrationem huiusmodi sic geras sollicite, fideliter et prudenter, circa possessionum recuperationem et iurium ipsius ecclesiae distractorum studium attentae sollicitudinis adhibendo, quod a retributore bonorum aeternae retributionis praemium assequi merearis nosque devotionem tuam propter hoc possimus dignis in Domino laudibus commendare. Datum Avinione, XVI kal. decembris,b anno quinto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°410., p.192
-
Reg. Vat. t. 71, ep. 865, apud Wadd. l. c. reg. pont. Io. XXII, p. 93.
1 -
(a) Qui quidem (ex ord. Praed.) postmodum rehabilitatus est, commisso sibi regimine ecclesiae Theban., cui praeerat, antequam patriarcha Antiochen. factus est.
-
(b) Non « septembris », sicut legitur apud Wadd. — In eumdem modum scriptum est: archidiacono et capitulo ecclesiae Papien., clero ac populo civ. et dioec. Papien., universis vassallis ecclesiae Papien.