« bullarium-franciscanum-3697 »

Dilecto filio Bertrando electo Salernitan.

Romani pontificis etc. Sane ecclesia Salernitana per obitum bonae memoriae Onuphrii archiepiscopi Salernitani, qui nuper apud sedem apostolicam diem clausit extremum, pastoris solatio destituta, nos volentes eidem ecclesiae paterna sollicitudine praecavere, ne dispendia prolixae vacationis incurreret, ad provisionem ipsius ecclesiae (cum nullus praeter nos hac vice de ipsius ecclesiae ordinatione se intromittere potuerit pro eo, quod nos dudum, circa promotionis nostrae principium ad apicem apostolicae dignitatis, provisiones omnium tam cathedralium quam aliarum ecclesiarum tunc apud dictam sedem vacantium et vacaturarum in antea dispositioni nostrae reservantes, decrevimus ex tunc irritum et inane, si secus super his per quoscumque scienter vel ignoranter contingeret attentari) coepimus intendere diligenter; et post deliberationem, quam ad deputandum eidem ecclesiae personam utilem et etiam fructuosam, cuius industria probitatis salubriter dirigi posset ac in suis iuribus adaugeri et etiam defensari, cum nostris fratribus habuimus diligentem, tamdem ad te ordinis fratrum Minorum professorem, in sacerdotio constitutum ac sacrae theologiae magistrum, propter laudanda tuae conversationis merita, vitae munditiam, gravitatem morum, circumspectionis expertae prudentiam, insigne donum scientiae aliasque virtutes multiplices, quibus personam tuam bonorum dator Altissimus decoravit, nobis et eisdem fratribus nostris acceptum, direximus oculos nostrae mentis, teque de fratrum ipsorum consilio eidem Salernitanae ecclesiae praeficimus in archiepiscopum et pastorem, curam et administrationem ipsius ecclesiae tibi in spiritualibus et temporalibus plenarie committendo etc. Datum Avinione, III nonas septembris, anno quarto.