« bullarium-franciscanum-3286 »

Dilectis filiis ‥ abbati monasterii sancti Mansueti extra muros Tullen.a et archidiacono maioris ac ‥ decano sancti Gengulphi Tullen. ecclesiarum.

Dudum fel. record. Bonifatius papa VIII praedecessor noster cupiens discordiam, quae inter praelatos et rectores seu sacerdotes et clericos parochialium ecclesiarum ex una parte, et Praedicatorum et Minorum ordinum fratres ex altera super praedicationibus fidelium populis faciendis, audiendis eorum confessionibus, poenitentiis iniungendis eisdem et tumulandis defunctorum corporibus, qui eligunt apud fratrum ipsorum loca vel ecclesias sepulturam, prorsus evellere, quamdam super his constitutionemb edidit, in qua ubi, quando et quomodo liceat eisdem fratribus praedicare, huiusmodi confessiones audire, poenitentias iniungere, qualiter etiam ipsi fratres liberam habeant sepulturam, et de quarta obventionum per eos eisdem parochialibus sacerdotibus et ecclesiarum rectoribus seu curatis integraliter exhibenda, plenius continetur. Nuper vero ex parte dilectorum filiorum prioris et fratrum Praedicatorum ac guardiani fratrum Minorum Meten.c fuit expositum coram nobis, quod, cum idem praedecessor super observatione dictae constitutionis ad instantiam rectorum seu curatorum, presbyterorum et clericorum parochialium ecclesiarum Meten. civitatis et dioecesis suas vobis certi tenoris litterasd direxisset, vos eisdem priori et guardiano et fratribus Meten. plura gravamina contra iustitiam intulistis, propter quae ex parte ipsorum ad sedem fuit apostolicam appellatum. Verum vos appellationi non deferentes huiusmodi vices vestras in hac parte dilectis filiis Iofrido cancellario, Ioanni praecentori et magistro Petro de Vinea canonico ecclesiae Metensis commisistis; qui talis commissionis praetextu priorem, guardianum et fratres Meten. praedictos multipliciter contra iustitiam aggravantes, appellatione praedicta contempta, diversas in eos excommunicationum et interdicti sententias pro eorum voluntatis libito promulgarunt. Cum autem super his omnibus ex parte dictorum prioris, guardiani et fratrum Meten. ad nos habitus sit recursus, nos quieti partium providere ac obviare scandalis, quae praemissorum occasione dicuntur in illis partibus exoriri, salubriter intendentes, ac propterea potestatem vobis in eisdem litteris traditam totumque negotium ad examen apostolicum revocantes, discretioni vestrae per apostolica scripta mandamus, quatenus super his ulterius per vos vel alium seu alios procedere nullatenus praesumatis, quin potius eisdem subdelegatis vestris inhibere curetis, ne se de his quomodolibet intromittant; nos enim nihilominus ex nunc irritum decernimus et inane, si secus super hoc a quoquam contigerit attentari. Omnes vero sententias latas et processus habitos super his per vos vel subdelegatos eosdem omnemque ipsorum sententiarum et processuum effectum suspendimus usque ad apostolicae sedis beneplacitum voluntatis. Datum Laterani, VIII idus novembris,e pontificatus nostri anno primo.