« bullarium-franciscanum-3217 »

BONIFACIUS &c.

Dilecto filio Fratri Porchetto de Domo Spinulæ Ordinis Fratrum Minorum, Administratori Ecclesiæ Januen. ac ... Inquisitori hæreticæ pravitatis in Provincia Januen. Salutem, & Apostolicam Benedictionem.

Per tuas, Fili Frater Porchette, litteras nuper non sine admiratione, quinimmo turbatione percepimus, quòd ... Potestas ... Abbas, Antiani, Consilium, & Commune Januensium, eorum obliti salutis, illos ex eis, qui præstiterunt, vel præstarent in posterum juramenta de non favendo ulteriùs Friderico, & Siculis rebellibus, aut eorum Nuntiis, vel fautoribus contra Nos, & Romanam Matrem Ecclesiam, ac carissimum in Christo filium nostrum Carolum Siciliæ Regem illustrem, sicut tibi Frater Porchette pridie per nostras litteras scripseramus, ab omni consilio statum ipsorum Ecclesiæ, & Regis contingente perpetuò privaverunt, & reddiderunt inhabiles ad Communis officia, & beneficia memorati, petentes ut a Clero Januensi non reciperentur ullatenus ad Divina, sed quòd potiùs Ecclesiarum introitus pateret aliis durantibus in errore. Cum igitur tam horrenda, tamque detestanda molimina notabili nota non careant damnabilis hæreticæ pravitatis, discretioni vestræ per Apostolica scripta mandamus, quatenus vos, vel alter vestrum per vos, vel per alium, seu alios, eosdem Potestatem, Abbatem, Antianos, Consilium, & Commune ex parte nostra monere, ac efficaciter inducere procuretis, ipsis districte mandantes, ut infra octo dierum spatium a monitione, inductione, & mandato hujusmodi numerandum, privationem, & inhabilitationem prædictas, ac alia quæcumque gravamina, molestias, & impedimenta, vel lata per eos, vel de mandato ipsorum contra præstantes juramenta prædicta penitus revocare procurent, & ab ulterioribus omnino desistant, quinimmo permittant libere, ut alii etiam, qui voluerint, præstare valeant hujusmodi juramenta, nullumque difficultatis exhibeant obstaculum in præmissis, alioquin ipsos ex eadem parte peremptorie citare curetis, ut infra unius mensis spatium post citationem hujusmodi prædicti Potestas, Abbas, Antiani, Consiliarii, & Commune per Syndicum, Procuratorem, seu Procuratores idoneos ad hoc specialiter constitutos cum pleno mandato nostro se conspectui repræsentent super præmissis recepturi pro meritis, ac nostris mandatis, & beneplacitis parituri. Prædicentes ipsis aperte, quòd nisi, ut præmittitur, comparere curaverint, ex tunc procedemus graviùs spiritualiter, & temporaliter contra eos, & quòd etiam prætextu dilationis, seu termini assignationis hujusmodi nequaquam differre, vel abstinere proponimus, quin & ipsa dilatione sine termini assignatione pendentibus procedamus, prout expedire viderimus contra ipsos. Diem autem monitionis, & citationis, & formam, & quidquid super hoc duxeritis faciendum, Nobis per vestras litteras harum seriem continentes celeriter intimare curetis. Datum Laterani VII. Kalendas Februarii, Pontificatus nostri Anno VII.