« bullarium-franciscanum-3214 »

BONIFACIUS &c.

Venerabili Fratria ... Episcopo. Gravinen.b & dilectis filiis ... Priori Prædicatorum, & .... Guardiano Minorum Fratrum Ordinumc Salutem, & Apostolicam Benedictionem.

Si displicet vobis præsumptio Laicorum, quos excusat quodammodo consueta licentia noxiæ libertatis, & ignorantia litterarum, non immerito ex Prælatorum excessibus provocamur, qui sub jugo Divinæ potentiæ specialiter constituti, quid sit beneplacitum Domino, quid eis utile, quid proximo salutare in serie sacræ paginæ speculantur. Sane dilecti filii Nicolaus de Excelso, Stephanus Dominici de Capua, Petrus Nicolai de Galeardo, Leo Dominici de Ruca, Johannes de Guirerio, & Nicolaus Vincentii de Caloleone Canonici Botontin.d in nostra proposuerunt præsentia constituti, quòd Venerabilis Frater noster Leuciuse Episcopus Botontin. motus indebite contra eos, & prætendens sibi fuisse suggestum, quòd iidem Canonici, & quondam Simeacca Primicerius, ac quondam Benedictus Sacrista Ecclesiæ Botontinen. Presbyteri consanguinei eorumdem nocturno tempore cameram ipsius Episcopi animo interficiendi eum clam intrantes quondam Guillelmum laicum familiarem, & Cocum ipsius ibidem inventum nequiter interfecerant, ex arruptof sine ulla cognitione prædictum Primicerium, qui a Civitate Botontin. nocte illa, qua præfatus Guillelmus dicitur fuisse occisus, de mandato dicti Episcopi absens erat, dictumque Sacristam etiam non convictos super hoc, nec confessos, vel etiam diffamatos, non absque injectione manuum in eos, Dei timore postposito, violentâ cæpit, & carceri mancipavit, ipsosque in ipsius Camera per familiares suos, diris, & variis tormentis fecit affligi, & demum asserens, quòd alter eorum confessus fuerat, se ac dictos Canonicos hujusmodi sceleris culpabiles extitisse, licèt aliàs de hoc non constaret eidem, Primicerium, & Sacristam prædictos ab eorum Ordinibus, quamvis tunc extra suam Civitatem, & Diœcesim existeret, degradavit, ipsosque per sæcularem Curiam suspendendos fore sententialiter judicans, eos prædictæ Curiæ tradidit, & suspendi per eamdem Curiam procuravit. Prælibatos insuper Canonicos officiis, & Beneficiis, ac omnibus bonis suis mobilibus, & immobilibus, tam ecclesiasticis, quàm patrimonialibus contra justitiam pro sua voluntate privavit, in eos nihilominus excommunicationis sententiam proferendo, & comminando publice, quòd ad destructionem eorum, & consanguineorum suorum usque ad quartam generationem procederet, si eum occasione hujusmodi viginti millia unciarum aurig expendere oporteret. Memoratus quoque Episcopus multa dicitur acquisisse de victualibus, & aliis rebus prohibitis, quas pluries transmisisse dignoscitur Sarracenis. Ad hæc præfatus Episcopus famam suam diversis sceleribus maculare non metuens retinere præsumit publice Concubinam, ac usurariam pravitatem exercens & simoniaca labe respersus, necnon diversis criminibus irretitus, matrimonia plura contracta legitime separare de facto contra legem Divinam mediante pecunia non expavit. Multa etiam alia enormia perpetrasse asseritur, quæ limam Apostolicæ correctionis exposcunt. Cum igitur talia nequaquam velimus, prout etiam nec debemus sub dissimulatione transire, ne transeant Prælatis aliis in exemplum, discretioni vestræ, de qua plenam in Domino fiduciam obtinemus, per Apostolica scripta mandamus, quatenus ad prædictam Ecclesiam Botontin. vel alia loca vicina, de quibus videritis expedire, vos personaliter conferentes, & habentes præ oculis solum Deum, inquiratis super præmissis omnibus diligentiùs veritatem, & si eum repereritis in præmissis, vel aliquibus eorum culpabilemh, ipsum ex parte nostra peremptorie citare curetis, ut infra duorum mensium spatium post citationem hujusmodi compareat personaliter coram Nobis, recepturus pro meritis, ac super iis mandatis nostris, & beneplacitis plenarie pariturus. Non obstante indulgentia, qua filii Prior, & Guardiane Ordinibus vestris &c. Quòd si non omnes iis exequendis potueritis interesse, tu Frater Episcope cum eorum altero ea nihilominus exequaris. Diem verò hujusmodi citationis & formam, & quidquid super iis inveneritis, vel egeritis in præmissis, Nobis per vestras litteras harum series continentes fideliter intimare curetis. Datum Laterani V. Idus Novembris, Pontificatus nostri Anno VI.