Général
-
Boniface VIII (1294-1303)
-
Creatur A. S. Legatus in tota Occidentali Italia. ex Reges. Vat. epist. cur. apud Raynaldum ad hunc annum n. 24.
-
Anno 1300. die 23. Maii.
-
1300
-
BONIFACIUS &c.
Venerabili F. Matthæoa Portuensi, & S. Rufinæ Episcopo Apostolicæ Sedis Legato Salutem, & Apostolicam Bened.
Considerantes attentiùs, & infra claustra pectoris meditatione sollicita revolventes, quòd nefanda hostis antiqui nequitia, qui semper quærit ut noceat, semper in circuitu ambulat, ut offendat, in plerisque Locis Lombardiæ, Tusciæ, & Romandiolæ Provinciarum, Aquilejensis, & Gradensis Patriarchatuum, Ravennatis, Mediolanensis, Januensis, & Pisani Archiepiscopatuum, Marchiæ Tervisinæ, Venetiarum, Bononiensis, & Ferrariensis Civitatum, earumque Diœcesum, & Territoriorum, locisque vicinis eisdem, discordiarum zizaniam seruit, ingessit lites, commovit scandala, odia suscitavit, grandi utique desiderio ducimur, curisque multimodis excitamur, ut malis hujusmodi molestis quamplurimum votis nostris efficacibus, & opportunis remediis obvietur, & Ecclesiasticis, Religiosis, sæcularibusque personis in partibus, locisque degentibus memoratis Apostolicæ Sedis benigna visitatione præventis, deformata inibi providam reformationem recipiant, prava & noxia procul penitus profligentur. Attendentes igitur, quòd gratiarum Dator Altissimus personam tuam scientiæ magnitudine, providentiæ dono, discretionis virtute, industriæ munere, circumspectionis gratia, & aliarum virtutum titulis decoravit, humeros tuos fortitudinis robore muniendo, ut onera grandia faciliùs supportares, plenam quoque, immo plenissimam de tuis laudabilibus meritis fiduciam obtinentes, licèt apud Sedem Apostolicam ex tui maturitate consilii tua non modicùm opportuna præsentia dignoscatur, Nosque illâ careamus inviti, te tamen ob honorem & exaltationem Ecclesiæ, ac reformationem, & directionem necessarias, ac desideratam quietem partium prædictarum, de Fratrum nostrorum consilio illuc tamquam pacis Angelum duximus destinandum, Fraternitati tuæ in Provinciis, Patriarchatibus, Archiepiscopatibus, necnon Civitatibus memoratis, earumque Diœcesibus, Districtibus, ac Territoriis, & Locis, ac partibus supradictis plenæ Legationis officium committentes, ut evellas, & destruas, dissipes, & disperdas, ædifices, & plantes, ac facias auctoritate nostra quæcumque ad honorem Dei, prosperum statum partium earumdem, ac reformationem pacis fidelium videris expedire &c.b. Datum Anagniæ X. Kal. Junii, Pontificatus nostri Anno VI.c.
-
Bullarium Franciscanum romanorum pontificum, tomus IV, n°CLXXXIV., p.504
-
(a) Matthæo: Aquaspartano O. M. paulò ante, & aliàs memorato.
-
(b) Expedire &c.: Hoc anno, inquit Chronicon Forolivien. in to. 22. Rer. Ital. Script. factus est Comes Provinciæ Romandiolæ, & Civitatis Bononiæ in temporalibus, & spiritualibus Dominus Matthæus de Aquasparta Cardinalis Episcopus, qui venit ad Civitatem Bononiæ, ubi stetit pluribus diebus: Exinde venit Imolam die Mercurii vii. Decembris; & die ix. Decembris venit Faventiam, ubi consecravit unum Episcopum in Ecclesia S. Petri Apostoli, & inde se transtulit die xii. Decembris idem Comes Forolivium Anno Domini MCCCI. die Veneris xiv. Februarii supradictus Dominus Cardinalis Comes Romandiolæ, dum esset in Civitate Ravennæ, fecit Parlamentum generale in loco, ubi dicitur Canazosia, qui locus est in confinibus Districtus Faventiæ, & Districtus Ravennæ: & in ipso Parlamente fuerunt Domini Fridericus Comes filius Comitis Guidonis de Montefeltro Capitaneus Cæsenæ cum Ambaxiatoribus ipsius Civitatis, Dominus Maghinardus Paganus Capitaneus Civitatum Forlivii, Faventiæ, & Imolæ cum Ambaxiatoribus ipsarum: & ibidem proposuit de faciendo pacem, & concordiam generalem, & specialiter in dicta provincia Romandiolæ.
-
(c) Scripsit etiam Pontifex Præsulibus, & Regionum, locorumque Præsidibus, ac ceteris Proceribus, quibus præcepit suum illi operam commodare ex cit. Reges. Vatic. apud laudatum Raynaldum.