Général
-
Boniface VIII (1294-1303)
-
Non amplius teneatur subministrare Fratri Philippo Ordinis Minorum quondam Fesulano Episcopo pensionem illam, quam aliàs ei subministrandam præscripserat. ex Reg. Vat. epist. 400. anni 6.
-
Anno 1300. die 17. Januarii.
-
1300
-
BONIFACIUS &c.
Venerabili Fratria ‥ Episcopo Spoletan. Salutem, & Apostolicam Benedictionem.
Sinceræ devotionis affectus, quem ad Nos, & Apostolicam Sedem habere dinosceris, promeretur, ut ad tuæ quietis commoda benigniùs intendentes te, & Ecclesiam Spoletanam a quibuslibet oneribus relevemus. Cum itaque dudum dilecto filio Fratri Philippob de Perusio Ordinis Fratrum Minorum olim Episcopo Fesulano, qui Episcopali cessisse nosciturc oneri, & honori, centum florenos aureos per Episcopum Spoletanum, qui esset pro tempore, nomine pensionis singulis annis constituerimusd persolvendos, quibusdam ei super hoc executoribus deputatis: Nos te, & prædictam Ecclesiam Spoletanam ex certis, & rationabilibus caussis, quæ Nos movent, a solutione dictæ pensionis exonerare volentes tibi, & successoribus tuis præsentium auctoritate concedimus, ut ad solvendum prædicto Fratri Philippo pensionem eamdem de cetero nullatenus teneamini, nec ad id a quoquam valeatis quomodolibet coarctari: Non obstantibus quibuscumque litteris Apostolicis dictis Fratri Philippo, & executoribus, vel quibusvis aliis super hoc concessis, vel sub quacumque verborum forma directis, de quibus, eorumque totis tenoribus plenam & expressam, ac de verbo ad verbum oporteat in præsentibus fieri mentionem. Nulli ergo omnino hominum liceat hanc paginam nostræ concessionis infringere, vel ei ausu temerario contraire. Si quis autem hoc attentare præsumpserit indignationem Omnipotentis Dei, & Beatorum Petri & Pauli Apostolorum ejus se noverit incursurum. Datum Laterani XVI. Kalendas Februarii, Pontificatus nostri Anno Sexto.
-
Bullarium Franciscanum romanorum pontificum, tomus IV, n°CLXXVII., pp.495-496
-
(a) Fratri: Nicolao Albertino, sive de Martino e Prato in Etruria O. P. qui cum Procurator Generalis Ordinis sui esset Romæ apud S. Sedem, a Bonifacio VIII. ad Spoletanam Sedem evectus est anno 1299. non Kalendis Julii, ut fallitur Ughellus, sed Kalendis Junii, ut ex Bernardo Guidone, Fontana, Cavalerio, & Echardo ostendit Auctor Bullar. Prædic. to. 2. pag. 74. Vicarii munere in Urbe, & Apostolici Legati apud Reges Britanniæ, & Galliæ functus est. Demum a B. Benedicto XI. Cardinalis Episcopus Ostiensis, & Velitrensis renunciatus est anno 1303. die 18. Decembr. diesque suos Avenione complevit anno 1321. Ughell. in Ital. Sac.
-
(b) F. Philippo: de quo in epist. 148. hujus Pontif. pag. 473. no. (a).
-
(c) Cessisse noscitur: ut ex eadem epistola liquet.
-
(d) Constituerimus: anno 1298. die 26. April. ut ex hujus Pontificis superiori epist. 149.