Général
-
Boniface VIII (1294-1303)
-
Statuta quædam patefacit, quorum executionem illis commendat. ex Reg. Vat. Pontif. epist. 181. anni 5.
-
Anno 1299. die 10. Junii.
-
1299
-
BONIFACIUS &c.
Dilectis filiis ... Ministro Provinciali Syriæ Minorum, ac Prædicatorum, & Heremitarum Sancti Augustini Nicosien.a Prioribus Fratrum Ordinum Salutem, & Apostolicam Bened.
Gerentes cordi negotium Terræ Sanctæ, ad quod status robustus, & pacificus Regni Cypri multùm creditur valiturus, provisionem, & ordinationem quandam inter carissimum in Christo filium nostrum H.b Cypri Regem Illustrem, & Venerabiles Fratres nostros Archiepiscopum Nicosien.c & suffraganeos ejus, & dilectos filios Magistros Conventus, & Fratres Domorum Hospitalis Sancti Johannis Jerosolymitani, & Militiæ Templi morantes in dicto Regno pro ejusdem Regni feliciori statu, & tuitione majori, ac validiori impugnatione hostium nominis Christianid per nostras sub certa forma litteras, quas vobis præsentari voluimus nuper duximus faciendam; Cupientes igitur ut provisio, & ordinatio ipsa plenum, & debitum sortiatur effectum, discretioni vestræ, de qua fiduciam in Domino gerimus spiritualem per Apostolica scripta districte præcipiendo mandamus, quatenus efficacibus monitis, inductionibus & consiliis insistatis, sicut viri providi apud partes, quòd provisionem, & ordinationem eandem velint, & studeant inviolabiliter observare; ac nihilominus, si opus fuerit, partes ipsas ad id, & contradictores quoslibet rebelles auctoritate nostra appellatione postposita compellatis. Non obstantibus, si eis, vel eorum aliquibus, aut quibusvis aliis communiter, vel divisim a Sede Apostolica sit indultum, vel contigerit indulgeri, quòd interdici, suspendi, vel excommunicari non possint per litteras Apostolicas, quæ de indulto hujusmodi plenam, & expressam, vel de toto ejus tenore, seu de verbo ad verbum, aut de Personarum, & locorum nominibus non fecerint mentionem. Quòd si non omnes iis exequendis potueritis interesse, duo vestrum ea nihilominus exequantur, sic vos in hac parte diligentiùs, & sollicite habituri, quòd prudentiam vestram in Domino exinde commendare meritò valeamus. Datum Anagniæ IV. Idus Junii, Pontificatus nostri Anno Quinto.
-
Bullarium Franciscanum romanorum pontificum, tomus IV, n°CLXVIII., pp.487-488
-
(a) Nicosien.: Nicosia Urbs Insulæ Cypri Archiepiscopalis quondam, nunc verò sub Turcarum dominio.
-
(b) H.: Henricum, de quo Raynaldus ad annum 1286. n. 33. 1289. n. 68. & alibi.
-
(c) Arch. Nicosien.: fortassis Joannem Minoritam, quem a Nicolao IV. ad hanc Sedem evectum fuisse anno 1288. testimonium perhibet Vaddingus n. 37. de eoque nos. supra egimus pag. 44. no. (e).
-
(d) Christiani: Amissum enim jam Jerosolymæ fuerat Regnum, & sola Cyprus Christianis supererat. Dissensio autem inter Henricum, & Templarios spem regni reparandi adimebat. Quapropter Bonifacius inter eos conventiones quasdam statuit, & ordinationes per Epistolam Anagniæ datam hoc anno 3. Id. Jan. Henrico etiam hac eadem die scripsit, ut circa Hospitalarios, & Templarios benigniùs se haberet, & hæ sunt litteræ, quas ut securiùs observarentur, præsentari voluit Pontifex Provinciali Ministro O. M. in Syria, aliisque supra citatis. Dedit & Epistolam ad fideles, ut si quid dubii ex Constitutione præfata oriretur, Apostolicam Sedem immediate consulerent. Apud Raynaldum ad hunc annum n. 37.